I pyetur sot në një konferencë për shtyp nëse do të ketë një “Foltore 2”, Sali Berisha nuk dha një përgjigje të qartë, por zgjodhi të përdorë slogane të zakonshme për lirinë, të drejtat e njeriut dhe misionin e Partisë Demokratike.
“PD është partia e lirisë dhe e të drejtave të njeriut. Nuk ka asnjë lloj impresioni apo kufizimi ndaj askujt,” tha Berisha, ndërsa shmangu çdo koment konkret mbi nevojën për një analizë të thelluar apo përballje reale me pakënaqësitë brenda partisë.
Ai theksoi se partia po ecën drejt “finalizimit të denoncimit të farsës elektorale” dhe se do të marrë masa për përmirësim, por pa përmendur asnjë mekanizëm konkret – përveç nocionit të përgjithshëm të “zgjedhjes” që, sipas tij, është thelbi i lirisë në PD. “Një koncept që më duket më i ndershëm dhe që i përshtatet PD-së,” shtoi ai.
Në fund, Berisha nuk harroi të kritikojë ata demokratë që kërkojnë një analizë reale për rezultatin dhe funksionimin e partisë. “Ata që nuk e kanë të qartë se zgjedhjet ishin farsë, kanë mungesë të kulturës elektorale,” tha ai, duke i etiketuar zërat kritikë më shumë si të painformuar sesa të shqetësuar.
Me pak fjalë, përgjigjja për një “Foltore 2” ishte e qartë: guxoni dhe e shihni se ku do përfundoni.
