Në një kohë kur të gjithë bashkëpunëtorët dhe njerëz afër Erion Veliajt po e braktisin një nga një duke vënë krah drejtësisë me dëshmitë e tyre, avokatët e e kryebashkiakut kanë reaguar duke konsideruar publikimin e pjesëve nga dosja hetimore në media, si një shkelje flagrante të ligjit dhe një përpjekje për të kthyer procesin penal në një gjyq publik spektakolar.
Në një deklaratë për mediat, përfaqësuesit ligjorë të Veliajt theksojnë se rrjedhjet e vazhdueshme nga hetimet paraprake dhe publikimi i dëshmive të dëshmitarëve përbëjnë jo vetëm cenim të rëndë të sekretit hetimor, por edhe një përpjekje të qëllimshme për të ndërtuar një “narrativë të gatshme publike” përpara se çështja të shqyrtohet në një sallë gjyqi.
“Në një shtet demokratik dhe evropian, drejtësia zhvillohet brenda institucioneve të drejtësisë, jo në tituj gazetash apo rrjete sociale”, thuhet në deklaratë, duke shtuar se rrjedhjet e paligjshme të informacionit e kanë kthyer procesin në një “farsë publike”.
Sipas avokatëve, këto veprime përbëjnë një dështim të organeve hetimore për të garantuar integritetin e procedurës penale dhe minojnë rëndë standardet e drejtësisë që i kërkohen Shqipërisë si vend kandidat për në Bashkimin Evropian.
Në deklaratë, theksohet gjithashtu se Veliaj, si kryetar i zgjedhur me mbi 160 mijë vota, vijon të mbahet në “izolim total” dhe në “kushte të pajustifikuara kufizuese”, çka sipas tyre, përbën pengesë për ushtrimin e detyrës së tij dhe një dëm të madh për qytetin e Tiranës.
“Ne po dokumentojmë çdo akt që cenon procedurën dhe rendin kushtetues. Jemi të bindur se ndjekja penale ndaj z. Veliaj do të shembet përballë një gjykate të paanshme dhe do të zbulohet për atë që është në të vërtetë: një ndjekje me prapavijë politike që dëmton drejtësinë dhe interesin publik”, përfundon reagimi.
Ky qëndrim i avokatëve vjen në një kohë kur interesimi publik dhe mediatik për çështjen Veliaj ka qenë i lartë, ndërkohë që hetimet e SPAK vijojnë në lidhje me veprimtarinë e Bashkisë së Tiranës.
