Në një deklaratë të fortë për mediat, Sali Berisha akuzoi drejtoreshën e Zyrës Kombëtare të Urbanistikës, Adelajda Roko, si pjesë të një rrjeti të lidhur me eksponentë të botës së krimit dhe politikës. Ai e përshkroi Rrokon si “Ergys Agasi me pantallona” dhe shtoi se ajo është motra e dy personave të afërt me Suel Çelën. Sipas Berishës, lidhjet e saj shtrihen deri në familjen e kryeministrit Edi Rama, duke kërkuar nga mediat të ndriçojnë këto që ai i quajti “të vërteta tragjike”.
Berisha denoncoi gjithashtu rënien drastike të eksporteve dhe prodhimit industrial në vend, duke e lidhur këtë me qarkullimin e narkoeuros, që sipas tij ka zhvlerësuar monedhën dhe ka falimentuar me mijëra biznese. Ai ngriti pyetjen se si është e mundur një rënie me 30 për qind e eksporteve në një ekonomi tregu pas pandemisë, duke theksuar se përgjigjja qëndron te paratë e drogës që kanë deformuar ekonominë dhe konkurrencën.
Në thelb të deklaratës së tij, Berisha akuzoi qeverinë se ka shndërruar administratën shtetërore në një polici politike në shërbim të manipulimit të votës. Ai tha se disponon regjistrat e dhjetëra mijëra zyrtarëve të institucioneve publike, përfshirë polici, prokurori, gjykata dhe spitale, të cilët përdoren si patronazhistë dhe mercenarë elektoralë. Si shembull përmendi laptopin e zyrës së Belinda Ballukut në Fier, ku sipas tij ndodhen emrat dhe funksionet e “terroristëve elektoralë” që janë përdorur në zgjedhje.
