Në prag të përballjes mes Anglisë dhe Norvegjisë në Botëror, vëmendja nuk është përqendruar vetëm te dueli mes dy prej futbollistëve më të mirë të momentit, Jude Bellingham dhe Erling Haaland, por edhe te miqësia e veçantë që i lidh prej vitesh.
Dy yjet u njohën gjatë kohës kur ishin bashkë te Borussia Dortmund dhe që prej asaj kohe kanë krijuar një raport të ngushtë, i cili është bërë viral në rrjetet sociale gjatë këtij Botërori. Video të shumta ku ata përqafohen, festojnë së bashku apo bëjnë shaka me njëri-tjetrin janë shpërndarë miliona herë, duke u kthyer në një nga temat më të komentuara mes tifozëve.
Një nga momentet më të famshme daton nga shtatori i vitit 2021, kur pas një fitoreje të Dortmundit ndaj Besiktasit, Haaland po lavdëronte Bellingham para kamerave si një lojtar “i jashtëzakonshëm”. Pikërisht në atë moment, Bellingham iu afrua dhe norvegjezi i dha një puthje me humor në faqe, skenë që vazhdon të qarkullojë edhe sot në internet.
Një tjetër video shumë e shpërndarë tregon Haaland duke ndërhyrë për të mbrojtur mikun e tij pasi një kundërshtar e shtyu gjatë një ndeshjeje.
Ekspertët e komunikimit thonë se kjo miqësi ka sjellë një imazh ndryshe të futbollistëve modernë. Sipas tyre, Bellingham dhe Haaland shfaqin një anë më njerëzore, larg rivalitetit dhe polemikave që dominojnë zakonisht rrjetet sociale.
Miqësia e tyre u vu re që në kohën te Borussia Dortmund, ku klubi publikoi edhe një video për Shën Valentin, ku dy futbollistët lexonin batuta romantike me humor për njëri-tjetrin, duke shkaktuar të qeshura te tifozët.
Në rrjetet sociale, fansat madje kanë krijuar me humor termin “Cleated Rivalry”, duke e krahasuar raportin e tyre me histori të njohura të kulturës pop, edhe pse të dy futbollistët janë në lidhje me partnere femra.
Edhe jeta e Haaland jashtë fushës ka shtuar simpatinë e publikut. Sulmuesi norvegjez jeton një jetë të qetë me partneren e tij të fëmijërisë, Isabel Haugseng Johansen. Në një intervistë ai tregoi se mbrëmjet i kalojnë duke gatuar, duke luajtur Minecraft së bashku ose duke u kthyer në qytetin e tij të lindjes për të porositur qebap.
Pavarësisht se të shtunën do të jenë rivalë në fushë, miqësia mes Jude Bellingham dhe Erling Haaland vazhdon të jetë një nga historitë më të pëlqyera të këtij Botërori, duke treguar se rivaliteti sportiv dhe respekti i ndërsjellë mund të ecin krah për krah.
