Kreu i Partisë së Lirisë Ilir Meta gjatë një konferencë për shtyp pranoi se ka takuar sekretarin e Përgjithshëm në PD, z.Flamur Noka. Sipas Metës takimi ka ardhur në kuadër të mobilizimit opozitar, i cili do të nisë nga nesër në protestë e thirrur para Bashkisë së Tiranës dhe do vijojë të përshkallëzohet deri në mbajtjen e zgjedhjeve vitin e ardhshëm. Teksa në lidhje me daljen në një listë me PD, mohoi kategorikisht. Ilir Meta: Jam takuar dje me Nokën. Ka qenë një takim miqësor, është diskutuar për tema të ndryshme të bashkëpunimit, që nga përshkallëzimi i protestave dhe koordinimi më i mirë i veprimit opozitar, për të forcuar bashkëpunimit në drejtim të zgjedhjeve 2025. Zgjedhjet e 2025 janë të rrezikuara, apelojmë për rritjen e mobilizimit opozitar për të mbrojtur votën nga ky regjim. Partia e Lirisë ka nisur mobilizimin e saj në Tiranë dhe në rrethe, në mënyrë që të arrijmë një rezultat spektakolar në zgjedhje. E rëndësishme është fryma e aksionit opozitar ndaj narko-shtetit. PL në çdo rast do donte fitoren e opozitës. Në radhë të dytë vendosjen e fitores së opozitës si objektiv të përbashkët të gjithë forcave opozitare dhe do të preferonte që të dilte me logon dhe flamurin e saj, por kjo është një çështje që nuk e vë në diskutuam luajalitetin e PL ndaj aksionit opozitar.
