Kreu i PD, Sali Berisha, në emisionin “Çim Peka Live” është pyetur nëse PD ka mbetur pas me përgatitjet për fushatën duke u fokusuar tek dosja e SPAK, ai u përgjigj se po mbron një kauz për çdo shqiptar duke demaskuar reformën në drejtësi.
"Kjo është një mënyrë. E vërteta është që unë po mbroj një kauzë të madhe. Po mbroj një kauzë për çdo shqiptar. Po u faktoj shqiptarëve produktin e reformës së Xhorxh Sorosit në Shqipëri. Nga njëra anë, ka lënë shqiptarët pa drejtësi. Sot një qytetar shqiptar, falë kësaj anti-reforme që bazohet te mafia shqiptare dhe ndërkombëtare, pret me vite për të marrë një vendim për një çështje civile apo penale. U them shqiptarëve dy gjëra: bilanci i luftës kundër korrupsionit të zyrtarëve të korruptuar të SKAP, krahasuar me të dënuarit në vitin 2008-2009, është tre herë më i vogël. Qëllimi kryesor është të mbroj qytetarët shqiptarë nga një mashtrim i madh, nga ky produkt monstruoz i një reforme që i la ata me një institucion që sillet dhe tejkalon falsifikimet e ish-hetuesve të Sigurimit të Shtetit. Ky është një mision dhe është një nga misionet më të rëndësishme për opozitën. Nëse ne si opozitë nuk rrëzojmë mitin e krimit dhe terrorit, ne nuk meritojmë të jemi opozitë” – është shprehur Berisha.
Berisha më tej tha se nuk sulmon SPAK-un për hallin e tij personal, por sipas tij pasi zbuloi se ky institucion ishte mburojë e krimit elektoral.
“SPAK-un unë kam filluar ta sulmoj pak kohë pasi u bëra kryetar i PD, kur konstatova se ai ishte mburojë e krimit elektoral. Kur konstatova se ata amnistonin krimin monstruoz elektoral, dëshmuan se ata ishin palë në rrënimin e procesit zgjedhor në Shqipëri. Dora dorës u informova se ata përdorin dosjet e krimit për ryshfete të tmerrshme, se ata amnistojnë projekte për atentate politike të rrezikshme” – tha Berisha.
