Deputetja socialiste Klotilda Bushka, aktualisht në qendër të vëmendjes për shkak të përfshirjes së saj në hetimet e SPAK, ka komentuar mungesën e kryebashkiakut Erion Veliaj në fushatën elektorale të PS-së. Bushka tha se ndonëse fizikisht Veliaj nuk është pranë kolegëve të tij, ai është “kudo përmes punëve që ka lënë pas”.
“Mua personalisht Erioni më mungon, si mik, si shok, si një shok partie, si një mbështetës jo vetëm i imi, por i të gjithëve. Sa herë kemi fushatë dhe jo vetëm, sa herë kemi problematika me qytetarët, kemi ndjerë gjithmonë mbështetjen e Bashkisë dhe të Erionit”, u shpreh Bushka.
“Erioni nuk mungon, ai është kudo – në çdo shkollë, kopsht, në çdo lagje dhe komunitet, veçanërisht në Njësinë 3”, u shpreh deputetja. “Unë pres që të sqarohen çështjet që e kanë përfshirë dhe ai të jetë sërish aktiv në politikë.”
Këto deklarata Bushka i dha në News 24, ku foli dhe për përgatitjet e Partisë Socialiste për zgjedhjet e 11 majit.
