Kryeministri Edi Rama vijoi takimet elektorale pasditen e sotme në qytetin e Kukësit. Në fjalën tij, Rama premtoi se synimi për qarkun e Kukësit në 2030 është që ta vizitojnë 1 milionë turistë.
“Kukësi 2030, të arrijë 1 milionë turistë si qark. Duke ju thënë atyre që nuk janë këtu, se besoj se 11 maji nuk është zgjedhje si gjithë të tjerat. Nuk është dita për tu marrë me fanellat e partive” – u shpreh Rama.
Duke folur për projektin “Paketa e maleve”, Rama u bëri thirrje çunave të Londrës ku ftoi të gjithë për të investuar, pasi për 500 aplikantët e parë nuk do të ketë taksa për 10 vjet.
“E di që na dëgjojnë edhe çunat në Londër. Për 500 aplikimet e para, për 10 vjet nuk do paguani asgjë. Thjesht do bëjnë investimin dhe 10 vjet nuk do kenë asnjë taksë për të paguar. I 501 do tatohet siç tatohen agroturizmat” – tha Rama.
Ai më tej tha se zgjedhjet në 11 maj nuk janë për karrigen e tij, por për interesin e shqiptarëve që në 2030 ti japin atyre pasaportën e BE.
“Ne të rriturit me 11 maj të bashkohemi dhe të fillojmë punën për të hedhur hapin e fundit që çdo fëmije ti japim pasaportën evropiane.Nuk është një fushatë për karrigen time, për një qeveri tjetër të PS. Në të gjitha rastet, të gjitha sondazhet PS do ti fitojë zgjedhjet e 11 majit, por një gjë është që PS të fitojë zgjedhjet dhe një gjë tjetër është që shqiptarët të bëhen një shumicë më e madhe se cdo herë tjetër”, tha Rama.
Ndërsa kreu i PD, Sali Berisha, menjëherë pas kthimit nga Spanja, ku mori pjesë për dy ditë në Kongresin e Partisë Popullore Evropiane në Valencia, zhvilloi një takim në zonën e Astirit në Tiranë.
Berisha tha se në kongresin e PPE në Valencia u ka folur kryeministrave të vendeve të tjera për aferën e inceneratorit të Tiranës. Sipas kreut të PD ata janë shprehur tepër të habitur, ndërsa për Edi Ramën i thanë se do ta ndjekë nga prapa McGonigal.
“Kur unë u tregoja kryeministrave të vendeve të tjera për djegësin e Tiranës ju them me sinqeritet shprehnin habi të papërmbajtur. Me duhej tja riktheja bisedën se një ndodhi të tillë nuk ka të përshkruar. Kurse teksa i tregoja për McGonigal, mendimi i tyre ishte se Rama do ta ndjekë atë prapa. Është i pashpresë sepse ka kryer një akt armiqësor ndaj vendit mik dhe vetë ai tani i thotë Ramës unë vërtet i mora, por paratë mi dhe ti. Kjo e bën të pashpresë Ramën”, tha ai.
Ndërkoh Berisha i ka bërë thirrje Ramës edhe nga takimi në Astir për një debat publik.
