Izraeli ka hapur në Banja Luka zyrën e parë përfaqësuese të Dhomës së tij të Tregtisë në Republikën Srpska, entiteti me shumicë serbe në Bosnjë-Hercegovinë. Nisma synon të forcojë marrëdhëniet ekonomike dhe të zgjerojë bashkëpunimin në tregti, investime dhe teknologji.
Në ceremoninë e inaugurimit morën pjesë ministri izraelit për Çështjet e Diasporës dhe Luftën kundër Antisemitizmit, Amichai Chikli, ambasadorja izraelite Galit Peleg, presidenti i Republikës Srpska, Milorad Dodik, si dhe anëtarja serbe e Presidencës së Bosnjë-Hercegovinës, Zheljka Cvijanoviç.
Zyra e re do të drejtohet nga biznesmeni izraelit Amir Gross Kabiri, i cili ka luajtur rol kryesor në realizimin e nismës. Ajo do të shërbejë si pikë e përhershme kontakti mes kompanive izraelite dhe bizneseve vendase.
Dodik deklaroi se Republika Srpska synon t’i ngrejë marrëdhëniet me Izraelin në nivelin më të lartë të mundshëm. Sipas tij, teknologjia dhe ekspertiza izraelite mund të ndihmojnë zhvillimin e rajonit, ndërsa kompanitë izraelite mund të përfitojnë nga mundësitë që ofron një treg pranë Bashkimit Evropian.
Presidenti i Republikës Srpska bëri të ditur se ideja për hapjen e zyrës ishte propozuar nga kryeministri izraelit Benjamin Netanyahu gjatë takimit të tyre në Jerusalem. “Për Izraelin mund të jetë një hap i vogël, por për ne është një nga zhvillimet më të rëndësishme të dekadës së fundit”, tha Dodik.
Ministri Amichai Chikli theksoi se zyra nuk duhet të mbetet vetëm një simbol i marrëdhënieve të afërta, por të shndërrohet në një mekanizëm konkret për zhvillimin e biznesit.
“Kjo dhomë nuk duhet të jetë thjesht ceremoniale, por duhet të funksionojë. Ajo duhet të bëhet një adresë e përhershme për kompanitë izraelite që kërkojnë mundësi në Republikën Srpska dhe në rajon, si dhe për bizneset vendase që duan të hyjnë në tregun izraelit”, deklaroi ai.
Chikli u bëri thirrje delegacioneve të biznesit nga Izraeli të vizitojnë Banja Lukën, ndërsa sipërmarrësit vendas të udhëtojnë drejt Izraelit për të identifikuar projekte dhe për të nënshkruar marrëveshje konkrete.
Në një mesazh përshëndetës, presidenti izraelit Isaac Herzog tha se zyra e re i jep formë konkrete miqësisë së ndërtuar ndër vite. Ai renditi industrinë e avancuar, prodhimin, bujqësinë, menaxhimin e ujit dhe shëndetësinë si sektorët me potencialin më të madh për bashkëpunim.
Sipas Herzogut, zyra në Banja Luka mund të shërbejë në të ardhmen si një urë për forcimin e lidhjeve të Izraelit jo vetëm me Republikën Srpska, por edhe me Bosnjë-Hercegovinën, Ballkanin dhe rajonin më të gjerë.
