Çmimet globale të ushqimeve janë ngjitur në nivelin më të lartë që prej fundit të vitit 2022, sipas të dhënave më të fundit të Organizatës së Kombeve të Bashkuara për Ushqimin dhe Bujqësinë.
Indeksi i FAO-s u rrit gjatë gushtit, i ndikuar nga kushtet e pafavorshme të motit dhe ndërprerjet e furnizimit të shkaktuara nga lufta në Detin e Zi.
Rusia dhe Ukraina janë ndër eksportuesit më të mëdhenj të drithërave në botë, ndaj sulmet ndaj porteve, anijeve tregtare dhe infrastrukturës së eksportit po krijojnë shqetësim për furnizimin global. Guardian raporton se vetëm në korrik 23 marinarë humbën jetën në sulmet ndaj 35 anijeve në Detin e Zi, ndërsa goditjet janë intensifikuar si nga Rusia ashtu edhe nga Ukraina.
Rritja e çmimeve prek veçanërisht vendet që varen nga importet e grurit në Lindjen e Mesme dhe Afrikën e Veriut. Oxford Economics parashikon se çmimet globale të ushqimeve mund të rriten me afro 12% gjatë këtij viti, nëse vazhdojnë problemet e furnizimit dhe goditjet klimatike.
