Presidenti i Shteteve të Bashkuara të Amerikës, Donald Trump, ka deklaruar se Vladimir Putin nuk ka ndërmend të sulmojë territorin e NATO-s, ndërsa ka konfirmuar se administrata amerikane po intensifikon përpjekjet diplomatike për t’i dhënë fund luftës mes Rusisë dhe Ukrainës.
“Putini nuk ka ndërmend të sulmojë territoret e NATO-s”, tha Trump gjatë një prononcimi në Zyrën Ovale. I pyetur për qëndrimin e presidentit rus dhe rrezikun e një përshkallëzimi ndaj vendeve të Aleancës, Trump u shpreh se e njeh mirë liderin e Kremlinit.
“Po flas me Putinin. E njoh shumë mirë”, tha presidenti amerikan.
Në të njëjtën kohë, Trump bëri të ditur se të dërguarit e tij, Steve Witkoff dhe Jared Kushner, janë nisur drejt Rusisë dhe Ukrainës me një propozim konkret që synon t’i japë fund konfliktit, i cili ka hyrë në vitin e pestë.
“Steve Witkoff dhe Jared Kushner sollën me vete një propozim për t’i dhënë fund luftës”, deklaroi Trump, duke vlerësuar dy të dërguarit e tij si negociatorë të aftë dhe duke thënë se ata kanë ndihmuar më parë në zgjidhjen e disa konflikteve.
Witkoff dhe Kushner pritet të vizitojnë fillimisht Moskën, ku do të zhvillojnë takime me zyrtarë rusë, ndërsa më pas do të udhëtojnë drejt Kievit për të zhvilluar bisedime me presidentin ukrainas Volodymyr Zelenskyy. Zelenskyy ka konfirmuar se dy përfaqësuesit amerikanë pritet të mbërrijnë në Ukrainë të dielën.
Trump ka shprehur optimizëm për misionin diplomatik, duke deklaruar se ekziston një mundësi e mirë për të arritur një marrëveshje. Megjithatë, detajet e propozimit amerikan nuk janë bërë ende publike, ndërsa negociatat zhvillohen në një moment kur sulmet ruse dhe ukrainase vazhdojnë dhe tensionet mbeten të larta.
Misioni i Witkoff dhe Kushner shihet si një përpjekje e re e Washingtonit për të rikthyer në tryezën e negociatave Moskën dhe Kievin, pas muajsh pa një përparim të rëndësishëm diplomatik.
