Ministri izraelit i Sigurisë Kombëtare, Itamar Ben-Gvir, ka deklaruar se marrëdhëniet e tij me kryeministrin Benjamin Netanyahu janë përkeqësuar sërish, duke thënë se kreu i qeverisë nuk dëshiron të shfaqet publikisht në fotografi me të.
“Jemi rikthyer në ditët kur Netanyahu nuk dëshiron të fotografohet me mua”, deklaroi Ben-Gvir, duke iu referuar tensioneve dhe përplasjeve të vazhdueshme brenda koalicionit qeverisës izraelit.
Ministri i Sigurisë Kombëtare foli gjithashtu për kërcënimet ndaj tij, duke pretenduar se është njëkohësisht ministri më i mbrojtur dhe më i kërcënuar në Izrael.
“Jam ministri më i mbrojtur në Izrael, por edhe ministri më i kërcënuar. Janë përpjekur të më vrasin dhjetë herë”, tha Ben-Gvir.
Deklaratat e tij vijnë në një periudhë kur marrëdhëniet mes partnerëve të koalicionit të Netanyahut janë shoqëruar vazhdimisht me mosmarrëveshje politike, veçanërisht për mënyrën se si duhet të vijojë politika e Izraelit ndaj Gazës.
Ben-Gvir, një nga figurat më të djathta të qeverisë izraelite, ka qenë prej kohësh një zë i fortë në favor të një linje më të ashpër ndaj palestinezëve. Vetëm së fundmi ai ka ripërsëritur propozimet për largimin e palestinezëve nga Rripi i Gazës, duke e kthyer këtë çështje në një prej pikave kryesore të platformës së tij politike.
Qëndrimet e tij kanë shkaktuar vazhdimisht polemika brenda dhe jashtë Izraelit, ndërsa përplasjet me Netanyahun tregojnë edhe një herë tensionet e brendshme në kampin e djathtë izraelit, në prag të zgjedhjeve parlamentare të 27 tetorit 2026.
