Eurodeputeti gjerman Michael Roth ka reaguar ashpër ndaj mënyrës se si Serbia po e trajton kthimin e trupit të ish-komandantit të Ushtrisë së Republika Srpskës, Ratko Mlladiç, i dënuar për gjenocid, krime kundër njerëzimit dhe krime lufte gjatë luftës në Bosnje-Hercegovinë.
Roth tha se nuk e kishte imagjinuar se do të shihte një person të dënuar për krime lufte, të cilin e cilësoi si përgjegjës për gjenocidin e Srebrenicës, të pritej dhe nderohej në Beograd.
Sipas eurodeputetit gjerman, një qasje e tillë dëshmon se sa larg është Serbia nga pajtimi, për të cilin, sipas tij, Ballkani Perëndimor ka nevojë urgjente.
“Faleminderit të gjithë serbëve që e kundërshtojnë publikisht këtë turp”, shkroi Roth, duke shprehur mbështetje për qytetarët serbë që kanë dalë kundër glorifikimit të Mlladiçit.
Trupi i Mlladiçit u kthye më 3 shtator në Beograd me një avion qeveritar serb, ndërsa arkivoli ishte i mbuluar me flamurin e Serbisë dhe u prit nga familjarë, zyrtarë dhe pjesëtarë të ushtrisë. Trupi u dërgua më pas për autopsi në Akademinë Mjekësore Ushtarake.
Çështja ka shkaktuar reagime të forta edhe në Bruksel. Komisionerja evropiane për Zgjerimin, Marta Kos, anuloi vizitën e planifikuar në Serbi, duke e lidhur vendimin me atë që e cilësoi si “glorifikim” të një personi të dënuar për gjenocid dhe krime lufte. Kos deklaroi se një qasje e tillë është e papajtueshme me vlerat mbi të cilat bazohet rruga evropiane e Serbisë dhe theksoi nevojën për përballje me të kaluarën, pajtim të sinqertë dhe respekt për viktimat.
Mlladiç u dënua me burgim të përjetshëm nga mekanizmi gjyqësor i Kombeve të Bashkuara për krime të kryera gjatë luftës së Bosnjës, përfshirë gjenocidin e Srebrenicës. Në korrik të vitit 1995, forcat serbe të Bosnjës vranë më shumë se 8 mijë burra dhe djem boshnjakë.
Ish-komandanti serb i Bosnjës vdiq më 27 gusht në Hagë, në moshën 84-vjeçare, ndërsa vuante dënimin e përjetshëm. Në Serbi janë paralajmëruar një ceremoni përkujtimore dhe varrimi i tij më 7 shtator, ndërsa debati për nderimet që po i bëhen ka nxitur reagime të forta në Serbi, Bosnje-Hercegovinë dhe në institucionet e Bashkimit Evropian.
