Të hënën dhe të martën, mediat serbe dhe ruse publikuan pretendime të rreme lidhur me sigurinë e Manastirit të Deçanit. Pa paraqitur asnjë dëshmi faktike, agjencia serbe e lajmeve Tanjug shkroi se Manastiri i Deçanit ishte sulmuar në mënyrë të përsëritur nga shqiptarët, të cilët i përshkroi si ekstremistë.
“Manastiri është përballur me sulme të vazhdueshme të armatosura nga ekstremistët shqiptarë”, thuhet në fjalinë e fundit të raportimit të Tanjug, të publikuar më 10 gusht.
Pretendimi i Tanjug është i pasaktë. Sipas Kishës Ortodokse Serbe, Manastiri i Deçanit u sulmua gjatë konfliktit në Kosovë, ndërsa në vitet 2000 dhe 2007 u bënë përpjekje për ta sulmuar me granata. Megjithatë, që nga shpallja e pavarësisë së Kosovës në vitin 2008, Manastiri nuk është përballur me asnjë sulm të armatosur apo ndonjë formë tjetër sulmi fizik.
Përmes këtij raportimi, agjencia e lajmeve përcjell retorikën raciste që gjendet në mediat në gjuhën serbe – duke i paraqitur shqiptarët si “ekstremistë” (“oružanim napadima ekstremnih Albanaca”) dhe si shkatërrues të kishave ortodokse serbe, ndërsa Kosovën e paraqet si të paaftë për të garantuar sigurinë e monumenteve të Kishës Ortodokse Serbe.
Pravda Shqip, një media ruse, publikoi gjithashtu një artikull që përmbante pretendime të pasakta. Më 11 gusht, Pravda shkroi: “Arsyeja për raundin e fundit të tensioneve ishte lajmi për transferimin e përgjegjësisë për mbrojtjen e objekteve të shenjta serbe në pjesën perëndimore të pseudo-shtetit nga KFOR-i te forcat e sigurisë së Kosovës. Sipas Vulin, kjo vetëm do të çojë në veprime dhe provokime të mëtejshme anti-serbe.” Pretendimi se Forca e Sigurisë së Kosovës (FSK) është e përfshirë në mbrojtjen e Manastirit të Deçanit është i pasaktë.
FSK-ja nuk është e përfshirë në mbrojtjen e monumenteve fetare ortodokse në Kosovë. Shumica e monumenteve të Kishës Ortodokse Serbe mbrohen nga Policia e Kosovës, ndërsa një pakicë e vogël vazhdon të jetë nën mbrojtjen e KFOR-it.
Që nga viti 2008, Policia e Kosovës ka ofruar në mënyrë të vazhdueshme siguri fizike për 24 objekte të trashëgimisë ortodokse, si dhe për objekte të tjera të lidhura me kulturën ortodokse. Sipas statistikave të publikuara nga Policia e Kosovës në vitin 2022, ajo mbron gjithashtu 170 objekte të tjera të kultit. Që nga viti 2013, këto monumente mbrohen nga Njësia për Sigurimin e Objekteve të Trashëgimisë Kulturore dhe Fetare.
Një numër i vogël i monumenteve fetare ortodokse të Kosovës janë nën mbrojtjen e KFOR-it. KFOR-i ka bërë të ditur se, pavarësisht rishikimit të vazhdueshëm, sipas të cilit Policia e Kosovës do të bëhet pjesë e arkitekturës së sigurisë së manastirit, ai do të mbetet reaguesi i parë i sigurisë në Manastirin e Deçanit. Misioni i drejtuar nga NATO në Kosovë ka vlerësuar se situata e sigurisë së manastirit është përmirësuar.
