Partia e Nigel Farage, Reform UK, është përfshirë sot në një skandal të ri financimesh në Britani, pasi dy zyrtarë të lartë të saj u pezulluan pas një investigimi me kamera të fshehtë të Channel 4 News. Sipas raportimeve, James Orr dhe Dan Jukes u filmuan duke diskutuar mënyra për të siguruar fonde nga një donator i huaj, gjë që ligji britanik për financimin e partive politike e ndalon.
Investigimi pretendon se zyrtarët e Reform UK diskutuan pranimin e një donacioni prej 30 mijë paundësh nga një “donator amerikan”, i cili në fakt ishte pjesë e operacionit të fshehtë. Paratë, sipas raportimit, do të përdoreshin për sondazhe në favor të Reform UK dhe më pas rezultatet do të qarkullonin në media si matje të pavarura politike.
Farage është filmuar gjithashtu në takim me personat që paraqiteshin si donatorë, por ai ka mohuar çdo shkelje. Ai e ka cilësuar rastin si “kurth” dhe ka thënë se partia nuk ka pranuar para të paligjshme. Megjithatë, Reform UK ka nisur hetim të brendshëm dhe ka pezulluar dy zyrtarët e përfshirë.
Çështja tani ka kaluar edhe në duart e institucioneve. Laburistët dhe Liberal Demokratët kanë kërkuar hetim nga policia, ndërsa Komisioni Zgjedhor britanik po shqyrton materialet e publikuara.
Skandali i sotëm është goditje e rëndë për Farage, pikërisht në momentin kur Reform UK po zhvillon konferencën vjetore në Birmingham dhe po përpiqet të shfaqet si alternativë qeverisëse. Në vend të programit politik, partia u detyrua të merret me pyetjen që e ndjek prej muajsh: kush po e financon Reform UK dhe sa të pastra janë paratë që mbajnë në këmbë makinën politike të Farage.
