Pavarësisht armëpushimit të arritur më shumë se dy muaj më parë, tensionet mes Izraelit dhe Hezbollahut vijojnë të mbeten të larta, ndërsa një kodër strategjike në jug të Libanit është kthyer në një pikë të re përplasjeje.
Bëhet fjalë për kodrën Ali Taher, pranë qytetit Nabatiyeh, një zonë me rëndësi të veçantë ushtarake për shkak të pozicionit të saj dhe rrjetit të tuneleve të ndërtuara nga Hezbollahu.
Zona vazhdon të jetë objekt i sulmeve ajrore dhe bombardimeve izraelite, ndërsa Hezbollahu është përgjigjur edhe me dronë.
Shtetet e Bashkuara, të cilat po ndërmjetësojnë mes Libanit dhe Izraelit, kanë propozuar që Hezbollahu t'ia dorëzojë kontrollin e kodrës ushtrisë libaneze, si pjesë e një marrëveshjeje më të gjerë për çarmatimin e grupit.
Hezbollahu e ka refuzuar propozimin.
Izraeli pretendon se ka vendosur “kontroll operacional” mbi zonën dhe se aty ndodhet një infrastrukturë e konsiderueshme nëntokësore e Hezbollahut.
Ushtria libaneze, nga ana tjetër, ka shprehur gatishmërinë për të marrë kontrollin e territorit në kuadër të një marrëveshjeje që do të shmangte një përshkallëzim të ri.
Përplasjet e vazhdueshme po shtojnë shqetësimet se armëpushimi i brishtë mund të dështojë dhe kufiri izraelito-libanez të përfshihet sërish në një konflikt më të gjerë.
