Një denoncim ka mbërritur në redaksinë e VNA, i shoqëruar me pamje nga grykëderdhja e përroit të Paprit, një prej degëve të lumit Shkumbin. Qytetari që ka dërguar videon thotë se kompania 2T ka rinisur marrjen e inerteve në zonë për ndërtimin e Korridorit VIII.
Marrja e inerteve ishte ndërprerë pas rrëshqitjes së dherave që bllokoi rrugën e Librazhdit disa muaj më parë. Përpara ndalimit, në këtë përrua ishin kryer ndërhyrje përgjatë kilometrave të tërë të shtratit, të cilat kanë lënë pas dëme të konsiderueshme. Tashmë makineritë janë rikthyer dhe shqetësimi është se vazhdimi i shfrytëzimit mund ta rëndojë edhe më shumë situatën.
VNA publikon pamjet dhe kërkon një reagim nga institucionet përgjegjëse për të sqaruar nëse marrja e inerteve nga kompania 2T është e autorizuar, çfarë sasie lejohet të shfrytëzohet dhe çfarë kontrollesh janë kryer për dëmin dhe ndikimin mjedisor në zonë.
