Dubai ka mbyllur regjistrimet për nismën turistike “A Dubai Invite”, pasi programi mori më shumë se 90 mijë aplikime nga banorët që dëshironin të ftonin miq dhe familjarë nga jashtë Emirateve të Bashkuara Arabe. Nisma u lançua në korrik me synimin që banorët e qytetit të shërbenin si “ambasadorë” të Dubait dhe të nxisnin vizitat e të afërmve dhe miqve nga vende të ndryshme të botës.
Programi ofronte përfitime me vlerë mbi 3 mijë dirhemë, rreth 700 euro, duke përfshirë zbritje për qëndrimet në hotele, oferta në restorante, si dhe bileta falas ose me çmime të reduktuara për disa prej atraksioneve më të njohura të qytetit. Për shkak të interesimit të jashtëzakonshëm, Departamenti i Ekonomisë dhe Turizmit të Dubait dhe partnerët e tij e rritën kapacitetin e paketave të përfitimeve me më shumë se trefish.
Deri tani janë shpërndarë më shumë se 30 mijë paketa përfitimesh. Edhe pse regjistrimet e reja janë mbyllur, programi vijon për banorët që kanë regjistruar me sukses mysafirët e tyre përpara se të arrihej numri përfundimtar i paketave.
Vizitorët e regjistruar mund të mbërrijnë në Dubai deri më 31 tetor 2026, ndërsa kushti kryesor është që udhëtimi të bëhet drejtpërdrejt nga jashtë Emirateve të Bashkuara Arabe. Përfitimet u jepen aplikantëve brenda 72 orëve nga mbërritja e mysafirëve dhe mund të përdoren në ambientet pjesëmarrëse deri më 31 dhjetor 2026.
Paketa përfshin oferta në hotele, restorante, atraksione turistike dhe shërbime transporti. Ndër atraksionet e përfshira janë Aquaventure Waterpark dhe IMG Worlds of Adventure, ndërsa oferta janë bërë të disponueshme edhe në një numër hotelesh dhe restorantesh në Dubai.
Nisma është pjesë e përpjekjeve të Dubait për të ruajtur ritmin e rritjes së turizmit pas një viti rekord. Në vitin 2025, qyteti regjistroi 19.59 milionë vizitorë ndërkombëtarë. Autoritetet turistike e kanë cilësuar interesimin e madh për “A Dubai Invite” si një tregues të rëndësisë që vizitat e miqve dhe familjarëve kanë për ekonominë turistike të qytetit.
Në të njëjtën kohë, sektori i turizmit në Dubai është përballur me një situatë më të ndërlikuar gjatë vitit 2026 për shkak të përshkallëzimit të konfliktit SHBA-Iran, i cili ka ndikuar në udhëtimet dhe trafikun ajror në rajonin e Gjirit.
