Protestuesit e kanë nisur ditën e 97-të të revoltës duke u mbledhur përpara Gjykatës Penale të Tiranës, në mbështetje të personave të arrestuar pas tensioneve të së martës para Kryeministrisë.
Për të arrestuarit pritet të caktohet sot masa e sigurisë, ndërsa protestuesit kërkojnë lirimin e tyre. Ata kishin paralajmëruar një ditë më parë se do të zhvendoseshin para gjykatës për të kundërshtuar mbajtjen e tyre në qeli.
Paralelisht, qytetarët kanë përsëritur kërkesën kryesore të protestës, e cila po i afrohet ditës së 100-të: dorëheqjen e kryeministrit Edi Rama dhe largimin e qeverisë.
Tubimi pritet të vijojë edhe në mbrëmje. Protestuesit do të mblidhen fillimisht në sheshin “Skënderbej” dhe më pas do të marshojnë drejt Kryeministrisë, ku do të mbahen fjalime. Më pas, marshimi do të shtrihet në disa prej rrugëve kryesore të Tiranës.
Mbrëmjen e kaluar u zhvillua dita e 96-të e protestës. Qytetarët u mblodhën përpara Kryeministrisë dhe marshuan nëpër kryeqytet me flamuj kombëtarë dhe flakadanë, ndërsa thirrën: “Rama në burg, Berisha në burg”, “Ju erdhi fundi” dhe “Shqipëri e Re”.
