Prokuroria e Fierit i dorëzoi gjykatën dosjen penale ndaj shoqërinë “S”’ sh.p.k. dhe administratorit të saj, S.L., për akuzën e fshehjes së të ardhurave, pasi rezulton se i detyrohen shtetit mbi 1 milionë euro. “Në përfundim të hetimeve të procedimit penal nr. 1150, të vitit 2021, përfshirë kontrollet tatimore, të dhënat bankare, të dhënat e deklaruara nga klientët e shoqërisë dhe aktin e ekspertimit kontabël, rezulton se gjatë viteve 2017–2018 kjo shoqëri nën drejtimin e administratorit të saj shtetasit S.L, nuk ka deklaruar të ardhura në vlerën 133.415.631 lekë për vitin 2017 dhe nuk ka dorëzuar librat e shitjes dhe të blerjes, duke i shkaktuar buxhetit të shtetit dëm të konsiderueshëm, si shkak i evazionit fiskal”, thekson prokuroria.
Përmes aktit të ekspertimit kontabël, rezulton se detyrimi tatimor i shmangur për periudhën objekt akuze arrin në 48.834.581 lekë. Përfshirë edhe gjobat, detyrimi total i shoqërisë ndaj buxhetit të shtetit, përfshirë gjobat dhe interesat, sipas Drejtorisë Rajonale Tatimore Fier, kap shifrën e mbi 1 mln euro.
