Protesta përpara Ministrisë së Arsimit në Tiranë është shoqëruar me tensione dhe përplasje fizike, pasi disa mbështetës të Partisë Demokratike kanë tentuar të largojnë nga tubimi një qytetar që kishte dalë në mbështetje të studentëve.
Situata është tensionuar kur qytetari ka kundërshtuar largimin, ndërsa mes tij dhe disa protestuesve ka pasur shtyrje dhe përplasje fizike.
Në mes të tensioneve, qytetari ka deklaruar se nuk përfaqëson asnjë forcë politike dhe se pjesëmarrja e tij në protestë lidhej vetëm me mbështetjen për të rinjtë.
“Jam familje e të përndjekurve. Jam përkrahës i rinisë, nuk jam kundër tyre. Nuk do të largohem. I kuptoj. Nuk kam marrë asnjë lek. Nuk jam pjesë e asnjë partie. Kam votuar PD-në, por nuk jam me asnjë parti. Rama dhe Berisha në burg”, është shprehur ai.
Pavarësisht deklaratave të tij, disa prej protestuesve kanë vijuar t'i kërkojnë të largohet nga tubimi, duke shkaktuar momente tensioni përpara Ministrisë së Arsimit.
Incidenti është regjistruar gjatë protestës kombëtare të studentëve, së cilës i janë bashkuar edhe mbështetës të Partisë Demokratike, pas marshimit të tyre nga Kryeministria drejt Ministrisë së Arsimit.
