Shtatë fëmijë të Kopshtit nr. 10 në Vlorë janë paraqitur në repartin e Pediatrisë, pasi kanë shfaqur shqetësime shëndetësore që dyshohet se lidhen me një helmim të mundshëm nga ushqimi. Pesë prej tyre janë shtruar në spital dhe po marrin trajtim mjekësor.
Fëmijët kanë shfaqur simptomat mbrëmjen e së premtes, 6 nëntor, kryesisht dhimbje barku dhe të vjella të vazhdueshme. Ndërkohë, prindër të tjerë kanë raportuar se edhe fëmijët e tyre kanë pasur shqetësime të ngjashme, por janë trajtuar në banesë, pa qenë e nevojshme të paraqiten në spital.
Pas evidentimit të rasteve, drejtuesit e spitalit kanë njoftuar Institutin e Shëndetit Publik, specialistët e të cilit kanë marrë mostrat përkatëse për analiza laboratorike.
Rezultatet e analizave pritet të përcaktojnë nëse problemet shëndetësore të fëmijëve janë shkaktuar nga ushqimi i konsumuar në kopsht apo nga faktorë të tjerë.
Deri në këtë fazë, helmimi ushqimor mbetet një dyshim paraprak, ndërsa autoritetet shëndetësore po verifikojnë rrethanat e ngjarjes dhe shkakun e simptomave të shfaqura te fëmijët.
