“Kam ekzekutuar dy persona në Shqipëri dhe më pas u arratisa në Greqi për t’u fshehur.” Kjo është dëshmia që, sipas raportimeve të mediave greke, ka dhënë para hetuesve 43-vjeçari shqiptar Nikolin Pali, i arrestuar në Athinë dhe i akuzuar për një vrasje të dyfishtë të ndodhur në vitin 2020.
Gjatë marrjes në pyetje, Pali dyshohet se ka pranuar se, përpara se të largohej drejt Greqisë, kishte kryer dy vrasje në Shqipëri. Sipas informacioneve të publikuara, ai kishte përdorur dokumente identiteti të falsifikuara për t’iu shmangur autoriteteve dhe për të qëndruar i fshehur.
Në dëshminë e tij, 43-vjeçari ka folur edhe për vrasjen e ish-partneres dhe të dashurit të saj në Greqi. Sipas të dhënave të hetimit, krimi i rëndë është kryer në vitin 2020, kur Pali dyshohet se ka goditur me sëpatë ish-partneren, pasi e kishte parë në shoqërinë e një burri tjetër.
Shqiptari u arrestua në zonën e Patisias, në Athinë, gjatë një operacioni të koordinuar të policisë greke. Gjatë kontrollit në apartamentin ku qëndronte, autoritetet sekuestruan një pistoletë dhe dy granata dore, të cilat ai nuk arriti t’i përdorte gjatë ndërhyrjes.
Sipas mediave greke, Pali ishte dënuar në mungesë me dy burgime të përjetshme, ndërsa kërkohej prej vitesh nga autoritetet në Greqi dhe Shqipëri.
Hetuesit po verifikojnë gjithashtu dyshimet se 43-vjeçari mund të jetë përfshirë në krime të tjera gjatë periudhës kur qëndronte i fshehur. Autoritetet greke po shqyrtojnë edhe informacionet sipas të cilave ai mund të ishte duke përgatitur një tjetër vrasje.
