Policia e Vlorës ka konfirmuar arrestimin e mësuesit 35-vjeçar të edukimit fizik në shkollën e bashkuar “Hajredin Beqari”, pas denoncimit të shtatë nxënëseve për ngacmim seksual. Mësuesi është transferuar në ambientet e paraburgimit në Vlorë, ku do të qëndrojë në pritje të seancës për vlerësimin e masës së sigurisë, që pritet të zhvillohet në ditët në vijim.
Nga shtatë nxënëset që kanë denoncuar rastin, dy prej tyre janë tërhequr nga deklarimet fillestare, ndërsa pesë të tjerat vijojnë t'u qëndrojnë pretendimeve se janë përballur me fjalë dhe sjellje të papërshtatshme nga ana e mësuesit. Sipas informacioneve të policisë, gjatë verifikimeve të kryera në telefonin e 35-vjeçarit nuk janë konstatuar mesazhe me përmbajtje ngacmuese.
Çështja tashmë pritet të shqyrtohet nga Gjykata e Shkallës së Parë e Juridiksionit të Përgjithshëm Vlorë, e cila do të vlerësojë provat dhe deklarimet e palëve. Dëshmitë e nxënëseve dhe materialet e administruara gjatë hetimit pritet të jenë pjesë e shqyrtimit gjyqësor për të sqaruar rrethanat e denoncimeve ndaj mësuesit.
