Prokuroria e Elbasanit ka sekuestruar mbi 300 tonë pluhur industrial nga Uzina e Ferrokromit, e administruar nga kompania koncesionare Albchrome, në kuadër të hetimeve për depozitimin dhe administrimin e mbetjeve të rrezikshme. Sipas Agjencisë Kombëtare të Mjedisit (AKM), materiali i grumbulluar nga procesi i prodhimit të ferrokromit paraqet rrezik të lartë për mjedisin dhe shëndetin publik.
Mbetjet janë sekuestruar në cilësinë e provës materiale, pasi konsiderohen të rëndësishme për zbardhjen e rrethanave që po hetohen. Megjithatë, për shkak të sasisë së madhe dhe natyrës së materialit, Prokuroria ka vendosur që ato të qëndrojnë në ruajtje pranë vetë kompanisë Albchrome, e cila ka detyrimin ligjor t’i administrojë dhe t’i vërë në dispozicion të hetuesve sa herë të kërkohet.
Çështja u evidentua më 28 maj, kur Inspektorati Kombëtar i Mbrojtjes së Territorit pezulloi aktivitetin e kompanisë, pasi gjatë kontrolleve konstatoi 318 tonë mbetje industriale të depozituara pa respektuar kushtet e nevojshme të sigurisë.
Nga verifikimet rezultoi gjithashtu se Albchrome nuk dispononte kontrata për transferimin, largimin, asgjësimin apo përpunimin e këtyre mbetjeve, pavarësisht rrezikshmërisë së tyre.
Situata u konsiderua shqetësuese edhe nga Agjencia Kombëtare e Mjedisit, e cila, në raportin e saj, i klasifikoi mbetjet si shumë të rrezikshme. Bëhet fjalë për pluhur të grumbulluar nga sistemet e filtrimit të emetimeve industriale, i cili kërkon kushte të posaçme administrimi dhe trajtimi.
Sekuestrimi i materialit shënon një tjetër zhvillim në hetimin penal ndaj kompanisë koncesionare, ndërsa mbetet për t’u përcaktuar nëse mënyra e depozitimit ka shkaktuar ndotje të mjedisit apo ka rrezikuar shëndetin e banorëve të zonës.
Hetimet e Prokurorisë së Elbasanit vijojnë për të përcaktuar përgjegjësitë lidhur me administrimin e mbetjeve, respektimin e detyrimeve ligjore dhe pasojat e mundshme të aktivitetit industrial.
Rasti ngre pikëpyetje mbi kontrollin e institucioneve përgjegjëse për mbrojtjen e mjedisit, veçanërisht për faktin se një sasi kaq e madhe mbetjesh të rrezikshme rezultoi e depozituar pa kushtet e nevojshme të sigurisë.
