Nga Trëndelina Gashi
Çfarëdo që të thonë justifikuesit në PD ajo pamje përplasjeje dhe dhune ndaj një njeriu që nuk proteston me parrullat e PD-së nuk mund të justifikohet, nuk e meriton të justifikohet dhe është shqetësuese.
Po e pranojmë në një moment se personi në fjalë ishte provokator. Grushtuesit e PD ranë menjëherë në kurthin e provokatorit dhe treguan që ndaj mendimit ndryshe apo një opozite joPD ata janë njësoj të dhunshëm si Rama. Pra e bashkëngjitën veten me Ramën më shumë sesa me protestën. Pra “provokatori” ia doli që të tregojë se Rama dhe Saliu ose PS dhe PD janë njësoj duke i dhënë edhe më shumë legjitimitet parrullës që hodhi.
Nëse objektivi i PD është të rrëzojnë Ramën, parrulla të tilla që sipas PD nuk përfaqësojnë ndjesinë e popullit opozitar nuk kanë pse t’i shqetësojnë por fokusin duhet ta kenë te objektivi madhor: goditja e Ramës.
Nëse, siç po del, personi vjen nga radhë vërtet opozitare dhe pjesë e të persekutuarve të këtij vendi, dhuna e PD ishte edhe më e shqetësuese. Kjo sjellje tregon që PD njësoj si PS ka mjet dhunën kundër mendimit e qëndrimit opozitar dhe joservil ndaj kreut të vet. Po të ishin kaq të përkorë në dinjitetin e tyre, do të duhet të kapnin me shpulla dhe eksponentë të sotëm të PD-së që në 8 janarin e tyre shkruajtën statuse mbi fundin politik të Berishës.
Me këtë lloj qasjeje PD vetë është në shërbim të Ramës. Së pari sepse e bën të justifikueshme dhunën e Ramës ndaj protestuesve. Së dyti sepse i krijon front të ri përplasjeje protestës dhe dobësuar energjinë. Së treti krijon klimën e mungesës së shpresës se ka një mënyrë që ky vend mund të shpëtojë nga gjirizi ku po mbytet.
Nëse dhuna e PD mbi protestuesit niset nga premisa e humbjes së votave opozitare, përsëri llogaritë janë gabim. Ajo pjesë e elektoratit që nuk ia ka dhënë votën PD-së pavarësisht se është në opozitë me PS e ka bërë këtë me ndërgjegje të plotë dhe ka qëndruar e tërhequr e heshtur në pritje të diçkaje që nuk i ngjan PD-së së pazareve me Ramën. As PD-së së kapur me afera me Ramën.
Ajo dhunë në protestën e së shtunës i bëri dëmin më të madh PD-së se na tregoi që për të ruajtur karrigen e opozitarit nuk ia përton drurit, njësoj si Rama nuk ia përton për të mbrojtur karrigen e qeveritarit.
Dhuna e së shtunës tregon mllefin që ka opozita e licencuar ndaj frymës së vërtetë opozitare në këtë vend. Dhe në fund duhet kuptuar që protesta për Shqipërinë e re nuk shpërtheu se vrau frikën. Kjo protestë shpërtheu sepse opozitarët bojkotues më së fundi panë një hapësirë shprese për një Shqipëri më të mirë. Prandaj vendosën të dalin nga gjendja e bojkotit. Prandaj përveç PS dhe PD ka shpërthyer në dhunë që tregu elektoral të vijojë të mbetet duopoli i tyre
