Franca po i kushton tre net këtij gushti qiellit, yjeve dhe planetëve. Nga 7 deri më 9 gusht mbahet edicioni i 36-të i “Nuits des Étoiles”, ose “Nata e Yjeve”, një nga aktivitetet më të mëdha popullore të astronomisë në vend.
Sipas “Le Monde”, këtë vit janë organizuar rreth 500 aktivitete në të gjithë Francën, ku qytetarët mund të vëzhgojnë yje, planetë, konstelacione, mjegullnaja dhe shiun e meteorëve Perseid. Aktivitetet janë falas dhe të hapura për publikun.
Edicioni i këtij viti ka në qendër Diellin dhe shërben si një lloj parapërgatitjeje për eklipsin diellor të 12 gushtit. Në Francë, eklipsi do të jetë i pjesshëm, por në disa zona, si Biarritz në jugperëndim të vendit, Hëna pritet të mbulojë deri në 99.4% të Diellit.
Për tre mbrëmje, astronomë amatorë dhe vullnetarë do të ndihmojnë publikun të dallojë objektet qiellore. Disa prej tyre, si Venusi, Saturni, Marsi apo trekëndëshi veror, mund të shihen edhe me sy të lirë, ndërsa për objekte më të largëta, si galaktika Andromeda, mund të përdoren dylbi apo teleskopë.
“Nata e Yjeve” u krijua në vitin 1991, sipas modelit të “Fête de la Musique”, festës së njohur franceze të muzikës. Qëllimi është ta nxjerrë astronominë nga laboratorët dhe observatorët dhe ta kthejë në një përvojë të hapur për të gjithë.
Sipas organizatorëve, interesi për qiellin është rritur edhe për shkak të eklipsit të pritshëm të 12 gushtit, i cili në disa zona të Europës, përfshirë Islandën, Groenlandën dhe veriun e Spanjës, do të jetë total.
Por ngjarja vjen edhe me një kujtesë për problemin e ndotjes nga drita. Sa më pak drita artificiale të ketë, aq më mirë shihet qielli. Në disa zona, ulja e ndriçimit publik ka ndihmuar në përmirësimin e vëzhgimit të yjeve, edhe pse satelitët në orbitë të ulët po bëhen një shqetësim i ri për astronomët dhe fotografët e qiellit.
Për francezët, këto tre net janë një ftesë e thjeshtë për të ngritur kokën lart. Në një verë të mbushur me vapë, lajme politike dhe tensione ndërkombëtare, Franca po u ofron qytetarëve një luks të rrallë: të shohin qiellin pa pagesë.
