Policia e Vlorës ka arrestuar mbrëmjen e së shtunës Renardo Nallbanin, i shpallur në kërkim në kuadër të hetimeve për dosjen e inceneratorit të Tiranës.
Sipas të dhënave paraprake, Nallbani është lokalizuar dhe arrestuar në vilën e tij në Palasë, pas veprimeve operative të kryera nga shërbimet e Policisë.
Ai akuzohet për disa vepra penale që lidhen me hetimet për inceneratorin e Tiranës, përfshirë “Pastrimi i produkteve të veprës penale ose veprimtarisë kriminale”, e kryer në bashkëpunim të veçantë në kuadër të grupit të strukturuar kriminal, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Nallbani ishte shpallur në kërkim prej rreth dy vitesh. Emri i tij është përmendur në kuadër të dosjes së inceneratorit të Tiranës, një nga hetimet më të mëdha të SPAK për korrupsion, pastrim parash dhe përfitime të dyshuara nga fondet publike.
Nallbani rezulton gjithashtu i dënuar nga Gjykata e Apelit të Torinos në Itali për veprat penale “trafikim i lëndëve narkotike” dhe “drejtim i organizatave kriminale”. Renardo Nallbani pritet të transferohet në bllokun e sigurisë në Tiranë.
DVP Vlorë
Finalizohet operacioni policor i koduar “Vila”.
Kapet një shtetas i shumëkërkuar për veprimtari kriminale të kryer në kuadër të grupit të strukturuar kriminal, i shpallur në kërkim nga SPAK.
Operacioni u zhvillua nga Forcat Operacionale të DVP Vlorë, në bashkëpunim me Drejtorinë e Forcës së Posaçme Operacionale në Departamentin e Policisë Kriminale dhe Forcën Kombëtare të Sigurisë, Njësia Fier.
Në vijim të operacioneve të njëpasnjëshme të kryera nga strukturat operacionale të DVP Vlorë, për kapjen e personave të shpallur në kërkim dhe me rrezikshmëri shoqërore, bazuar në informacionet e siguruara në rrugë operative për vendndodhjen e një shtetasi të kërkuar, u organizua dhe u finalizua operacioni policor i koduar “Vila”.
Në kuadër të këtij operacioni, në një vilë në Palasë, shërbimet operacionale dhe ato të Forcës Kombëtare të Sigurisë lokalizuan, kapën dhe arrestuan shtetasin e shumëkërkuar R. N., 50 vjeç, lindur në Fier.
Ky shtetas ishte shpallur në kërkim, pasi në korrik të vitit 2024, Gjykata e Posaçme e Shkallës së Parë për Korrupsionin dhe Krimin e Organizuar (GJKKO) i ka caktuar masën e sigurisë “Arrest në burg”, për veprat penale:
- “Pastrimi i produkteve të veprës penale ose veprimtarisë kriminale”, kryer në bashkëpunim, në kuadër të grupit të strukturuar kriminal;
- “Kryerja e veprave penale nga organizata kriminale dhe grupi i strukturuar kriminal”.
