Panairi i Librit ka hapur dyert dhe vetëm në ditën e parë të tij mijëra qytetarë kanë vizituar stendat e shtëpive botuese. Interesi i lexuesve ka qenë i lartë, por mungesa e ofertave apo uljeve të ndjeshme e bën librin sërish një luks për shumëkënd. Edhe këtë vit, çmimet mbeten të larta dhe librat të paarritshëm për një pjesë të madhe të lexuesve.
Ndërkohë që çdo vit pritet me interes për të parë prurjet e reja në tregun e librit, Biblioteka Kombëtare, institucioni që duhet të ishte “oazi” i leximit dhe shpërndarjes falas të dijes, është lënë në harresë.
E drejtuar nga një person që njëkohësisht është edhe pronar i një prej librarive më të mëdha në vend, institucioni duket se po vuan pasojat e konfliktit të interesit dhe mungesës së vizionit. Biblioteka Kombëtare është kthyer në një institucion pasiv, të cilit po i zbehet roli në zhvillimin e kulturës së leximit dhe ruajtjen e trashëgimisë së librit.
Nëse kjo gjendje nuk është e qëllimshme, mbetet për t’u pyetur se çfarë tjetër e justifikon neglizhencën ndaj një institucioni të tillë.
Sot, çdo lexues duhet të ndjejë përgjegjësinë për të reaguar ndaj kësaj apatie. Heshtja e intelektualëve dhe mungesa e zërit qytetar vetëm sa e thellon krizën e leximit. Është koha për të kërkuar një çlirim të Bibliotekës Kombëtare nga gjendja e “vegjetimit” ku është zhytur dhe për t’i rikthyer librit vendin që meriton në jetën kulturore të vendit.
