SPAK thërret Sali Berishën për të dëshmuar për ngjarjet e dhunshme të 21 janarit. Sipas burimeve ai duhet të paraqitet të premten, datë 14 nëntor 2025.
VNA ka siguruar fletëthirrjen drejtuar ish-kryeministrit, i cili do të japë shpjegime për gjithçka ndodhi brenda ambienteve të godinës së Kryeministrisë gjatë demonstratës së dhunshme ku u vranë 4 qytetarë.
SPAK po heton për të identifikuar urdhëruesin e vrasjeve të qytetarëve. Strasburgu ndërkohë e ka cilësuar 21 janarin si krim shtetëror.
Në bulevardin Dëshmorët e Kombit, para godinës së Kryeministrisë gjatë protestës së opozitës së kohës më 21 janar 2011 u vranë Ziver Veizi, Faik Myrtaj, Aleks Nika dhe Hekuran Deda. Për vrasjen e Veizit e Myrtaj janë dënuar me 1 vit burg ish-shefi i Gardës Ndrea Prendi dhe me 3 vite burgim ish-gardisti Agim Llupo.
