Ka ndërruar jetë analisti i njohur amerikan dhe një prej zërave më me ndikim për çështjet e Ballkanit, Janusz Bugajski. Lajmi është bërë i ditur nga Elez Biberaj, ish-drejtor në Zërin e Amerikës, i cili përmes një statusi në rrjetet sociale ka shprehur tronditjen dhe pikëllimin për humbjen e mikut dhe kolegut të tij të ngushtë.
“U trondita dhe u trishtova thellë kur mësova për ndarjen nga jeta të mikut dhe kolegut tim të ngushtë Janusz Bugajski. Janusz ishte një analist i shkëlqyer i çështjeve euroaziatike, një autor i frytshëm, botimet e të cilit formësuan thellësisht kuptimin tonë për rajonin dhe një avokat i palëkundur për demokracinë, qeverisjen e mirë dhe lirinë e shtypit,” shkruan Biberaj në rrjetin social Facebook.
Ai shtoi se Bugajski ishte një mysafir i rregullt dhe i vlerësuar në transmetimet e Zërit të Amerikës, dhe se pikëpamjet e tij ishin “vazhdimisht të qarta, parimore dhe thellësisht të informuara”.
“Gjatë viteve, kemi punuar së bashku në shumë projekte, veçanërisht në çështjet e Ballkanit. Arrita të admiroja jo vetëm për intelektin e tij, por edhe integritetin, zgjuarsinë dhe përkushtimin e tij të palëkundur ndaj vlerave që ai i mbante të shtrenjta. Mungesa e tij do të ndihet thellë nga të gjithë ne që patëm privilegjin ta njihnim dhe të punonim me të. Do të më mungojë shumë. Pusho në paqe, Janusz”, përfundon Biberaj.
Janusz Bugajski ishte një nga analistët më të njohur ndërkombëtarë për rajonin e Ballkanit, i pranishëm vazhdimisht në mediat shqiptare me intervista, analiza dhe opinione të guximshme. Ai ishte një zë kritik dhe i pavarur ndaj politikës rajonale, duke nxitur reflektim dhe mendim kritik në publik dhe tek vendimmarrësit politikë në vendet e Ballkanit.
