Një flotilje me mision humanitar është nisur ditët e fundit nga ujërat e Mesdheut me destinacion final Rripin e Gazës. "Global Sumud Flotilla", një iniciativë ndërkombëtare e pavarur, ka për synim të çajë bllokadën izraelite dhe të dorëzojë ndihma emergjente për popullsinë civile palestineze, e cila prej muajsh ndodhet në një krizë të thellë humanitare.
Në një mesazh video nga bordin e një prej anijeve, aktivisti Thiago Ávila deklaroi:
"Thuajini popullit të Gazës se po vijmë." Ai konfirmoi se flotilja është aktualisht në lundrim dhe se ndalesa e radhës do të jetë në Tunizi, ku pritet të bashkohen anije të tjera që mbajnë ndihma dhe aktivistë nga vende të ndryshme.
Kjo flotilje përfaqëson përpjekjen më të madhe të organizuar jashtë strukturave shtetërore për të ofruar ndihmë humanitare në një zonë të rrethuar nga lufta dhe ku hyrja e ndihmave është jashtëzakonisht e kufizuar. Ajo synon të tërheqë vëmendjen ndërkombëtare mbi krizën humanitare në Gaza dhe të sfidojë në mënyrë paqësore izolimin e vazhdueshëm të mbi 2 milionë palestinezëve.
Organizatorët e misionit theksojnë se veprimtaria e flotiljes është krejtësisht paqësore dhe e bazuar në të drejtën ndërkombëtare humanitare, duke apeluar për mbrojtjen e civilëve dhe respektimin e dinjitetit njerëzor.
