Hapet për qarkullim njëra nga urat e reja mbi Lumin Ibër në Mitrovicë. Lajmin e bëri publik, ministri në detyrë i Punëve të Brendshme i Kosovës, Xhelal Sveçla. Pak muaj më parë, qeveria në detyrë e Kosovës filloi me ndërtimin e dy urave të reja në të dy anët e urës kryesore mbi Lumin Ibër që ndan qytetin e Mitrovicës në dy pjesë: në atë veriore të banuar me shumicë serbe dhe atë jugore të banuar me shumicë shqiptare.
Qeveria e Kosovës ka theksuar vazhdimisht, se ndërtimi i këtyre urave, njëra për këmbësorë dhe tjetra për automjete, ka për qëllim “të lidhë Mitrovicën e Veriut me Mitrovicën e Jugut”, qytet i ndarë etnikisht që nga paslufta. “Të dashur qytetarë të Mitrovicës dhe gjithë Kosovës, urime ura e re”, shkroi Sveçla në Facebook, duke postuar një fotografi të veturave duke kaluar mbi urën e re mbi Ibër.
Fillimi i ndërtimit të urave të reja mbi Lumin Ibër u kundërshtua nga serbët lokalë. Bashkimi Evropian është shprehur, se “çdo projekt infrastrukturor ndërmjet Mitrovicës së Veriut dhe asaj të Jugut kërkon koordinim të ngushtë dhe dialog mes të gjitha komuniteteve të përfshira” dhe se “është e domosdoshme që këto projekte të pasqyrojnë vullnetin dhe nevojat e komuniteteve lokale”. Ura kryesore mbi Lumin Ibër në Mitrovicë, disa herë ka qenë arenë përplasjesh etnike pas luftës dhe që nga ajo kohë, ajo mbikqyret nga forcat e KFOR-it. Ajo është e hapur vetëm për këmbësorë.
