Tesla po përballet me një hetim nga rregullatorët federalë të sigurisë për të përcaktuar nëse ka vonuar njoftimin e qeverisë për aksidentet që përfshijnë teknologjinë e saj të ndihmës në drejtim.
Administrata Kombëtare e Sigurisë së Trafikut në Autostrada (NHTSA) po heton nëse kompania po respekton rregulloret që kërkojnë raportimin e të dhënave për aksidentet që përfshijnë makinat e saj, kur ato janë duke përdorur funksione të caktuara të ndihmës për shoferin. Në një dokument zyrtar të publikuar të mërkurën, NHTSA deklaroi se “aksidentet e raportuara kanë ndodhur disa muaj ose më shumë para datave të raportimeve. Shumica e këtyre raportimeve përfshijnë aksidente për të cilat ... koha e kërkuar për të dorëzuar raportin ishte brenda një ose pesë ditësh nga marrja e njoftimit për aksidentin nga Tesla.”
Shumë automjete Tesla janë të pajisura me Autopilot, një sistem i krijuar për të ndihmuar drejtuesit në autostrada me akses të kufizuar, dhe funksionin e ashtuquajtur “Drejtim të Plotë Autonom” (Full Self Driving), që supozohet se mund të drejtojë automjetin si në rrugë qytetase ashtu edhe në autostrada.
Të dyja funksionet janë të destinuara të përdoren vetëm kur ka një person në sediljen e shoferit, i cili është i vëmendshëm dhe mund të marrë kontrollin e makinës në çdo moment.
Ndërkohë që NHTSA ka disa hetime të hapura ndaj Teslës dhe përpjekjeve të saj për drejtim autonom, ky hetim i fundit është i pari që është nisur që kur Presidenti Donald Trump u rikthye në detyrë. Ai gjithashtu mund të shihet si një goditje tjetër ndaj bastit të Tesla-s se teknologjia e saj për drejtim autonom do të jetë thelbësore për rritjen dhe fitimin e saj në të ardhmen.
Investitorët kishin besuar se administrata Trump do të ishte në favor të ambicieve të CEO-së së Tesla-s, Elon Musk, për drejtimin autonom, ndoshta duke i dhënë fund hetimeve ekzistuese për sigurinë ndaj kompanisë. Musk kishte dhënë qindra miliona dollarë për fushatën e Trump dhe kishte shërbyer si një këshilltar i rëndësishëm pas inaugurimit të tij. Megjithatë, marrëdhëniet mes tyre janë përkeqësuar që atëherë.
NHTSA tha se Tesla ka deklaruar se ka rregulluar problemet e mëparshme me mbledhjen dhe raportimin e të dhënave të kërkuara. Agjencia tha se planifikon të auditojë të dhënat e Tesla-s për të zbuluar nëse kjo është e vërtetë.
Sekretari i Transportit, Sean Duffy, deklaroi në prill se departamenti i tij do të ndryshojë kërkesat për raportim, si pjesë e përpjekjeve për të promovuar automjetet autonome.
“Kemi dëgjuar nga partnerët e industrisë se kërkesat për raportimin e aksidenteve për automjetet e automatizuara janë shumë të kushtueshme,” tha ai gjatë prezantimit të programit për automjetet autonome. “Por këto raportime ndihmojnë DOT (Departamentin e Transportit) të monitorojë sigurinë në rrugë. Prandaj, për të balancuar këto shqetësime, kemi thjeshtuar procesin.”
Tesla u shpall përgjegjëse më herët këtë muaj për një aksident fatal në vitin 2019 me një Model S të pajisur me Autopilot, i cili u përplas me një makinë të parkuar, duke shkaktuar vdekjen e një pasagjeri. Kompania u urdhërua të paguajë 329 milionë dollarë dëmshpërblim. Tesla ka njoftuar se do ta apelojë vendimin.
CNN
