Erion Braçe nuk e ka kapërdirë ende furtunën e kritikave pas votës pro reformës territoriale. Por zemërimin nuk po e shkarkon mbi Edi Ramën, të cilit në fund iu bind, por mbi Agron Shehajn, që ia kishte parashikuar fundin rebelimit.
Deputeti socialist ka shpërthyer në Facebook kundër kreut të Partisë Mundësia, pa ia përmendur emrin, duke e quajtur oligark, kërmill dhe financues patronazhistësh që, sipas tij, e sulmojnë në rrjetet sociale.
Braçe shkon edhe më tej, duke hedhur akuza të rënda për burimin e pasurisë së Shehajt, nga shfrytëzimi i punonjësve te lidhjet e pretenduara me drogën dhe transaksionet fiktive. Madje thotë se dokumentet ua ka dorëzuar prej kohësh institucioneve të qeverisë, por ato nuk kanë vepruar.
“Nuk e kam kuptuar kurrë pse e kanë falur. Si thoni? Pse e kanë falur?”, pyet Braçe.
Dy ditë më parë, Shehaj e kishte quajtur përplasjen e Braçes me Ramën një teatër politik, duke parashikuar se deputeti socialist do të votonte pro reformës. Dhe pikërisht kështu ndodhi.
Tani Braçe kërkon hesap nga Shehaj pse e sulmon dhe nga institucionet pse nuk e hetojnë.
Vetëm me Ramën nuk ka më hesap për të larë. Atij ia dha votën.
