Gjykata Kushtetuese pritet të dalë sot me një vendim për ministren virtuale “Diella”.
Burimet thonë se gjyqtarët kushtetues janë mbledhur për të diskutuar çështjen, e cila mund të konsiderohet si më e debatueshmja deri më tani, për shkak se është rasti i parë që është dekretuar një ministre virtuale.
Kushtetuesja u vu në lëvizje nga Partia Demokratike. Objekti i padisë është: “Shfuqizimi i nenit 2, të Dekretit ‘Për emërimin e Kryeministrit’, nr. 331, datë 12.09.2025, të Presidentit të Republikës së Shqipërisë si të papajtueshëm me Kushtetutën e Republikës së Shqipërisë. Shfuqizimin e nenit 1, pika 1, fjalia e dytë, të Dekretit ‘Për emërimin e Këshillit të Ministrave’, nr. 333, datë 15.09.2025, të Presidentit të Republikës së Shqipërisë si të papajtueshëm me Kushtetutën e Republikës së Shqipërisë”.
“Krijimi i një ‘ministri’ virtual apo real nga Presidenti i Republikës është në tejkalim të kompetencave të Presidentit të Republikës, cenon kompetencat e Kryeministrit dhe Këshillit të Ministrave. Caktimi i përgjegjësive të reja nga Presidenti për Kryeministrin vjen në kundërshtim me Kushtetutën dhe ligjet, si dhe cenon edhe pushtetin legjislativ (Kuvendin), duke qenë ky i fundit i vetmi organ që ka të drejtën të miratojë ndryshime kushtetuese apo ligjore, të cilat shtojnë, pakësojnë, ndryshojnë përgjegjësitë dhe kompetencat e Kryeministrit”, thuhet në padinë e depozituar në gjykatë.
Bëhet me dije se gjatë këtyre muajve Gjykata Kushtetuese ka pasur diskutime edhe me Komisionin e Venecias lidhur me këtë çështje.
