Protesta e banorëve të Burimasit kundër projektit për furnizimin me ujë të fshatit Zvezdë është shoqëruar me tensione dhe përplasje me forcat e policisë.
Banorët bllokuan rrugën e fshatit, duke penguar kalimin e mjeteve të rënda të Shoqërisë Rajonale Ujësjellës-Kanalizime. Ata kundërshtojnë ndërhyrjen në burimin që, sipas tyre, siguron furnizimin me ujë të Burimasit dhe kërkojnë që për Zvezdën të gjendet një zgjidhje tjetër.
Situata u tensionua pas ndërhyrjes së policisë për lirimin e rrugës dhe vijimin e punimeve. Gjatë përplasjeve, një prej qytetarëve humbi ndjenjat, ndërsa tre protestues u shoqëruan në Komisariatin e Policisë Maliq.
Nga ana tjetër, Shoqëria Rajonale Ujësjellës-Kanalizime deklaron se projekti është pjesë e një skeme rajonale dhe nuk cenon furnizimin me ujë të Burimasit. Sipas përfaqësuesve të saj, kapaciteti i liruar në depon e Burimasit, pas zgjidhjes së furnizimit të Ormanit përmes një investimi tjetër, është parashikuar të përdoret për furnizimin e Zvezdës.
Ky argument nuk është pranuar nga banorët, të cilët kanë paralajmëruar vijimin e protestave, duke këmbëngulur se furnizimi i Zvezdës nuk duhet të bëhet në dëm të Burimasit.
