Pas mbledhjes së Këshillit të Sigurimit Kombëtar, të thirrur nga Presidenti Bajram Begaj, ka reaguar kreu i grupit parlamentar të Partisë Demokratike, Gazment Bardhi, i cili ka përdorur ironi për të komentuar takimin e zhvilluar sot.
Në reagimin e tij, Bardhi e quajti mbledhjen “Këshilli i Sigurimit të Gysit”, duke iu referuar një personi të përmendur prej tij në denoncimet e fundit.
“U mblodh Këshilli i Sigurimit të Gysit! 4 vartës të Gysit përballë dhe 4 përballë. Dhe në krye ishte kukulla, Presidenti i Gysit”, deklaroi Bardhi.
Kreu i grupit parlamentar të PD-së e lidhi reagimin edhe me ish-drejtoreshën e Shërbimit Informativ të Shtetit, Vlora Hyseni, duke kërkuar shpjegime nga Presidenti Begaj lidhur me emërimin e saj në krye të SHISH-it.
Sipas Bardhit, kreu i shtetit duhet të sqarojë se si është marrë vendimi për emërimin e Hysenit dhe se kush e ka propozuar atë për këtë detyrë.
“Begaj ka përgjegjësi. Kush e urdhëroi që të emëronte në krye të SHISH Vlora Hysenin?”, u shpreh Bardhi.
Deputeti demokrat kërkoi gjithashtu të bëhet e ditur se kush e propozoi fillimisht Hysenin si këshilltare dhe më pas si drejtuese të SHISH-it, si dhe çfarë verifikimesh u kryen përpara emërimit të saj.
Bardhi ngriti pikëpyetje edhe mbi referencat që, sipas deklarimeve të kryeministrit Edi Rama, janë dhënë nga shërbimet partnere ndërkombëtare për Hysenin. Ai kërkoi të bëhet e ditur se për cilët partnerë bëhet fjalë dhe nëse janë verifikuar të dhënat që lidhen me të kaluarën e saj profesionale.
Në reagimin e tij, Bardhi e lidhi çështjen edhe me përgjegjësinë politike të kryeministrit Rama, duke kërkuar transparencë për mënyrën e emërimeve dhe funksionimin e institucioneve shtetërore.
