Kreu i Grupit Parlamentar të Partisë Demokratike, Gazment Bardhi, ka reaguar ndaj deklaratave të kryeministrit Edi Rama për ndryshimet në Kodin e Procedurës Penale, duke e akuzuar atë se po kërkon të miratojë një ligj që, sipas tij, i shërben interesave personale.
Në një reagim në rrjetet sociale, Bardhi deklaroi se gjatë viteve të qeverisjes Rama e ka përdorur burgimin si një instrument për zgjidhjen e problemeve të ndryshme, duke përmendur ndërtimet pa leje, vjedhjen e energjisë elektrike, punën në të zezë dhe masat gjatë pandemisë së COVID-19.
Deputeti demokrat iu referua gjithashtu shqetësimeve të ngritura nga Këshilli i Europës në vitin 2014 për përdorimin e tepruar të paraburgimit në Shqipëri. Sipas Bardhit, qëndrimi i Ramës ndaj kësaj çështjeje ndryshoi pas arrestimit të kryebashkiakut të Tiranës, Erion Veliaj, në shkurt të vitit 2025.
Bardhi i lidhi ndryshimet e propozuara në Kodin e Procedurës Penale me zhvillimet e fundit që përfshijnë hetimet e SPAK-ut, duke pretenduar se kryeministri po vepron për interesat e tij.
“Deri tani Edi Rama ka bërë ligje me porosi për të tjerët. Sot, po qep një ligj sipas masës së vet”, deklaroi Bardhi.
