Komisioni i Prokurimit Publik ka rrëzuar tenderin e Ujësjellësit të Pogradecit me vlerë mbi 202 milionë lekë, ose rreth 2.2 milionë euro, për ndërtimin e ujësjellësit në fshatrat Urakë, Kotodesh dhe Katjel të Prrenjasit.
KPP ka shfuqizuar vendimin që shpallte fituese kompaninë “Shëndelli” SHPK dhe ka urdhëruar Shoqërinë Rajonale e Ujësjellës Kanalizimeve Pogradec të rivlerësojë procedurën, duke skualifikuar këtë operator për mosplotësimin e kritereve të veçanta teknike.
Vendimi i jep një kthesë të fortë një procedure prokurimi për të cilën VNA kishte ngritur më herët pikëpyetje, duke denoncuar përzgjedhjen e “Shëndelli” pavarësisht se në garë ishte paraqitur një ofertë më e ulët.
Gjithçka ndryshoi pas ankesës së bashkimit të kompanive “Balili Konstruksion”, “Apis Construction” dhe “Avduli”. Ky bashkim kishte ofruar rreth 185 milionë lekë për realizimin e punimeve, kundrejt 195.3 milionë lekëve të ofruara nga “Shëndelli”.
Por këtë herë, diferenca prej më shumë se 10 milionë lekësh mes ofertave nuk ishte problemi i vetëm.
Gjatë shqyrtimit të dokumentacionit, KPP konstatoi se “Shëndelli” nuk provonte se dispononte një prej makinerive kryesore të kërkuara nga tenderi, sondën HDD për shpim horizontal të drejtuar, pajisje e domosdoshme për realizimin e mikrotunelit të ujësjellësit.
Pikërisht këtu nisi të zbërthehej dokumentacioni me të cilin kompania ishte kualifikuar.
Sipas vendimit të KPP-së, në kontratat e paraqitura nga “Shëndelli” figuronin makineri të modeleve “Sandvik DX700” dhe “Tamrock”. Nga shqyrtimi rezultoi se këto ishin sonda shpimi për gurore dhe shkëmbinj dhe jo pajisje për shpim horizontal të drejtuar, siç kërkohej shprehimisht në dokumentet e tenderit.
KPP evidentoi gjithashtu probleme me formën e dokumentacionit. Një prej kontratave të qirasë, e lidhur me shoqërinë “Ekologjik Standart Internacional EKSI”, nuk ishte noterizuar, ndonëse një formë e tillë kërkohej nga dokumentet standarde të tenderit.
Në përfundim, Komisioni vlerësoi se “Shëndelli” nuk kishte arritur të provonte se dispononte makinerinë e kërkuar dhe për këtë arsye urdhëroi skualifikimin e kompanisë dhe rivlerësimin e procedurës.
VNA kishte ngritur më herët pikëpyetjet
Zhvillimi merr një tjetër peshë edhe për faktin se VNA kishte denoncuar më herët problematikat që shoqëronin këtë tender.
Në denoncimin e saj, VNA ngrinte pikëpyetje mbi mënyrën se si Ujësjellësi i Pogradecit kishte favorizuar ofertën e “Shëndelli”, në pronësi të biznesmenit Yzedin Bozhaj, ndërkohë që në garë kishte oferta që i kushtonin më pak buxhetit publik.
Tashmë çështja ka kaluar nga pikëpyetjet mbi diferencën financiare te dokumentacioni teknik me të cilin kompania kishte siguruar kualifikimin.
Vendimi i KPP-së ndryshon edhe renditjen e garës. Pas skualifikimit të “Shëndelli” dhe rivlerësimit të ofertave, bashkimi “Balili Konstruksion”, “Apis Construction” dhe “Avduli” mbetet në pozicion për të marrë kontratën.
Ndërkohë, për “Shëndelli”, në pronësi të Yzedin Bozhajt, pasojat mund të shkojnë përtej humbjes së tenderit. Mospërputhjet e konstatuara mes vetëdeklarimit dhe dokumenteve provuese mund ta ekspozojnë kompaninë ndaj një procedure përjashtimi nga prokurimet publike, nëse institucionet përgjegjëse vlerësojnë se janë plotësuar kushtet e parashikuara nga ligji.
Vendimi i KPP-së për tenderin e denoncuar më herët nga VNA rikonfirmon shqetësimin që kemi ngritur prej kohësh: riorganizimi i ujësjellësve në shoqëri rajonale nuk është reflektuar domosdoshmërisht në një administrim më të mirë të fondeve publike. Sepse, ndërsa struktura ka ndryshuar, mënyra e dhënies së tenderave duket se ka mbetur e njëjtë dhe emrat e përfituesve vijojnë të përsëriten. Ndryshimi më i dukshëm është zhvendosja e vendimmarrjes, nëse më parë tenderat zhvilloheshin nga ujësjellësit e bashkive, me drejtues të emëruar në nivel vendor, tashmë ato menaxhohen nga shoqëritë rajonale, me administratorët e tyre dhe me Ministrinë e Infrastrukturës dhe Energjisë e bashkitë si aksionere.
Kështu, përtej reformave, centralizimit dhe premtimeve për eficiencë e mirëmenaxhim, mbetet ende pyetja thelbësore, sa mirë po administrohen paratë publike? Sepse në fund janë qytetarët ata që paguajnë faturën, me shpresën e pashtershme se milionat e shpenzuara për ujësjellës do të sjellin më në fund atë për të cilën janë dhënë, ujë në rubinet.
