Arrestimi i ish-kreut të SHISH, Vlora Hyseni, e ka vënë mazhorancën në pozita të vëshitra, por Taulant Balla duket se e ka të thjesht të përgjigjet, duke kopjuar Elisa Spiropalin dhe Fatmir Xhafajn, duke thënë se korrupsion ka edhe në Gjermani e Itali.
“Korrupsioni ekziston kudo, edhe në Gjermani, Itali”, deklaroi ai, duke shtuar se e rëndësishme është që Shqipëria tashmë ka institucione drejtësie që hetojnë dhe u shkojnë deri në fund çështjeve.
Kreu i grupit parlamentar të PS-së deklaroi se socialistët nuk janë “avokatë mbrojtës të askujt” dhe se nuk komentojnë përmbajtjen e dosjeve të SPAK, duke përsëritur qëndrimin e kryeministrit sa herë vartësit bien në rrjetën e SPAK.
“PS nuk është avokate mbrojtëse e askujt. Në rastin e personave me mandat parlamentar, Kuvendi i Shqipërisë përmes së drejtës që i ka dhënë sovrani, e ka ushtruar këtë të drejtë dhe dua të rishpreh që Shqipëria sa i përket pjesës që lidhet me kufizimet e lirisë para vendimit të gjykatës, duhet t’i japë fund kësaj praktike”, tha ai.
Por Balla nuk kurseu edhe kritikat ndaj drejtësisë, duke thënë se Shqipëria është “delja e zezë e Europës” për përdorimin e masave të kufizimit të lirisë përpara një vendimi përfundimtar të gjykatës. Madje për të vërtetuar konkluzionin e tij, ai u kërkoi gazetarëve të pyesin për këtë ChatGPT.
