Gjykata e Apelit të Posaçëm do të zhvillojë të hënën, më 9 mars, një seancë gjyqësore për çështjen Balluku, gjatë së cilës pritet të shqyrtojë ankimin e ish-numrit dy të qeverisë, e cila kundërshtonte masën e pezullimit nga ushtrimi i funksioneve. Për shkak se ajo është shkarkuar nga të dy funksionet si zëvendëskryeministre dhe ministre e Infrastrukturës dhe Energjisë, kërkesa nuk ka më objekt, por gjykata është e detyruar t’i thërrasë palët.
Apeli i Posaçëm e kishte pezulluar ankimin e Ballukut për pjesën që lidhej me pezullimin në pritje të vendimit të Gjykatës Kushtetuese. Kjo e fundit e rrëzoi kërkesën e kryeministrit Edi Rama, i cili e cilësonte si antikushtetues vendimin e GJKKO-së për pezullimin e Ballukut. Menjëherë pas publikimit të vendimit të Gjykatës Kushtetuese, Apeli vendosi ta rihapë seancën dhe të shqyrtojë çështjen.
Për Ballukun është në fuqi ndërkohë masa e ndalimit për të dalë jashtë vendit, kundër së cilës ajo ka bërë rekurs në Gjykatën e Lartë.
Nga ana tjetër, më 12 mars Kuvendi pritet të votojë lidhur me kërkesën e SPAK, që kërkon leje për arrestimin e ish-numrit dy të qeverisë. Balluku akuzohet për abuzime me tendera në vlera qindra milionë euro.
