“Bashkia e Tiranës është lokomotiva në të gjitha drejtimet dhe mbështetja jonë.” Kështu u shpreh sot kryeministri Edi Rama, i cili, së bashku me kryebashkiakun Erion Veliaj dhe ministren Ogerta Manastirliu, mori pjesë në përurimin e godinave 16 dhe 17 në Qytetin Studenti, tashmë të rikonstruktuara me kushte bashkëkohore.
Ky është një nga rastet e rralla të një daljeje publike të përbashkët mes Ramës dhe Veliajt, pas një periudhe të gjatë në të cilën kryeministri dukej se e kishte distancuar kryebashkiakun e Tiranës. Kjo erdhi në një kohë kur SPAK ka nisur hetimet ndaj Veliajt për akuza që përfshijnë korrupsionin, pastrimin e parave dhe fshehjen e pasurisë. Hetimet janë intensifikuar me kontrolle në banesat dhe bizneset e familjarëve të tij, si dhe me sekuestrimin e celularëve.
Në muajt e fundit, Veliaj është parë gjithnjë e më pak në takimet politike apo në daljet publike përkrah Ramës. Edhe në rastet kur ishte i pranishëm, ai kishte një rol dytësor, ndërsa zona të rëndësishme elektorale janë mbuluar nga njerëz të tjerë të besuar të kryeministrit, si Blendi Gonxhja, Ogerta Manastirliu dhe Erion Braçe.
Megjithatë, ditët e fundit ka një riaktivizim të dukshëm të Veliajt, i cili po rikthehet në skenën politike. Gjatë fushatës së sotme, kryeministri e cilësoi Bashkinë e Tiranës si një “lokomotivë” që ecën përpara me “sukseset” e saj, pavarësisht aferave të shumta të denoncuara, si skandali 5D apo përfshirja e Veliajt në çështjen e inceneratorit të Tiranës.
Në këtë kontekst, mbetet për t’u parë nëse “lokomotiva” e Ramës do të vazhdojë përpara apo do të ndalet në SPAK, duke qenë se deri më tani pesë drejtues të rëndësishëm të saj ndodhen pas hekurave.
