Intervista e tretë e Arben Ahmetaj, më shumë se fakte dhe dokumenta, përcolli biseda dhe akte korruptive të cilat iu mveshën më së shumti zëvendëskryeministres Belinda Balluku. Ndërsa ish-zëvendëskryeministri tundi në duart e tij ca letra me shishe vere të printuara, pllakat e Erioles dhe “persekutimi” i tij familjar ishin për herë të tretë kryefjala e rrëfimit të tij televiziv.
Për të mos rënë në përsëritje të analizave të deklaratave të Arben Ahmetaj, por duke u përqendruar tek akuzat e tij, shumë pyetje mbeten pa përgjigje. Sepse ende nuk e kemi kuptuar nëse Arben Ahmetaj flet si një njeri që nuk ka asnjë përgjegjësi për inceneratorët apo thjesht e larguan nga loja dhe përfitimet miliona euro. Vërtet ish-zëvendëskryeministri nuk e di se kush janë emrat që fshihen pas pagesave në vazhdim të inceneratorit të Tiranës? A ka informacion ish zv/kryeministri se kush është biznesmeni që ka paguar klinikën e famshme të detoksit, ku ai pretendon se ka qenë Edi Rama?
Padyshim që Arben Ahmetaj ka përgjigje për këto, por dhe për pikëpyetje të tjera lidhur me aktet korruptive të qeverisë ku ai ka qenë zëvendësi nr. 1 i Edi Ramës. Në nderin e tij (nëse mund të konsiderohet i tillë) do ishte të tregonte me fakte dhe letra se kush janë përfituesit e vërtetë nga skema e inceneratorëve. Të jepte emra konkretë, të publikonte dokumente, kontrata, si dhe transaksione bankare. Dhe me këtë rast do të na bindte që SPAK po bën një punë gjysmake dhe është në shërbim të Edi Ramës.
Arben Ahmetaj është i përfshirë direkt në skemën e inceneratorëve dhe ai ka informacion të saktë e të qartë kush janë përfituesit direkt dhe ata të fshehur pas skemës (inceneratorit të Tiranës dhe dherave të tij). Nëse SPAK nuk ka aftësinë të hetojë, atëherë le të na e thotë së paku publikisht skemën dhe mos të na lodhë me shishe vere të printuara, të cilat i ka pirë bashkë me Edi Ramën.
Ai duhet së pari të flasë për rolin e tij, pastaj të zbërthejë rolin e Veliajt, Agaçit dhe çdo eksponenti të lartë socialist.
Përndryshe, edhe avokatët e tij të mëdhenj në publik, PD dhe kryetari i saj, bëjnë mirë që i dalin në krah dhe i mbajnë ison për korrupsionin që Ahmetaj e paska parë dhe denoncuar, por Rama nuk e ka dëgjuar. Por më shumë se kaq, duhet të nisin të artikulojnë disa emra që Ahmetaj i denoncon në tym dhe opozita i “mbron” me zell. Nuk ka arsye pse opozita të mbështesë denoncimet e Arben Ahmetajt për klinikën e detoksit në Itali, të përmendë në ajër që e di që biznesmeni e ka paguar dhe përfituar leje ndërtimi, e të bëjë sikur nuk e di emrin e tij. Korrupsioni në këtë rast është akt në bashkëpunim, kryetar qeverie–biznes.
E nëse është komode të sulmosh Ramën, e pakuptueshme është të fshehësh emrin e biznesmenit e të luash kukamshefti me publikun. Është në nderin e PD-së dhe denoncuesve të saj publikë të thonë që bëhet fjalë për bashkëshortin e Alketa Vejsiut, biznesmenin Adrian Nelaj, që ka përfituar leje ndërtimi dhe hotelin në jug.
Po ashtu, është në nderin e Ahmetajt që të mos hedhë tymnajë, por të publikojë faturat dhe çdo të dhënë tjetër.
Ai e di shumë mirë emrin e biznesmenit, siç di dhe lidhjen e tij me Ramën. Por nuk e artikulon dot, sepse më së pari duket se akuza të tilla i duhen për të fituar azil e së dyti mbase edhe vetë ai ka përfituar nga biznesi.
Ndaj loja e emrave që “amnistohen” ndoshta nuk ka emrin korrupsion, por peshën e rëndë para publikut e ka njësoj.
