Kriza në FIFA po thellohet, pasi Carlos Cordeiro, një nga këshilltarët më të afërt të presidentit Gianni Infantino, ka dhënë dorëheqjen në shenjë kundërshtimi ndaj planit për privatizimin e pjesshëm të Kupës së Botës.
Sipas gazetarit Ben Jacobs, i cili i referohet talkSPORT, Cordeiro vendosi të largohej pasi kundërshtoi hapur projektin e Infantinos për krijimin e një kompanie të re, ku investitorët privatë do të mund të blinin aksione të kompeticioneve më të rëndësishme të FIFA-s.
Në deklaratën e tij, ish-presidenti i Federatës Amerikane të Futbollit theksoi se nuk ka qenë pjesë e hartimit të këtij projekti dhe se e kundërshton plotësisht.
"Si këshilltar i lartë i presidentit të FIFA-s, një ish-bankier dhe një tifoz i përjetshëm i futbollit, nuk mund të rri duarkryq ndërsa FIFA shqyrton shitjen e aksioneve të saj në Kupën e Botës. Nuk kam qenë i përfshirë në zhvillimin e këtij propozimi dhe e kundërshtoj kategorikisht. Ky është biznes i keq për federatat anëtare të FIFA-s, biznes i keq për futbollin dhe biznes i keq për të ardhmen afatgjatë të lojës", deklaroi Cordeiro.
Dorëheqja e tij vjen në një moment kur presioni ndaj Infantinos është rritur ndjeshëm. UEFA, CONCACAF dhe Konfederata Aziatike e Futbollit (AFC) kanë dalë publikisht kundër planit të presidentit të FIFA-s, ndërsa së fundmi edhe 55 federatat anëtare të UEFA-s votuan në favor të bojkotimit të Kupës së Botës nëse projekti për privatizimin e turneut vazhdon.
