Presidenti i FIFA-s, Gianni Infantino, raportohet se ka hedhur në tavolinë një projekt ambicioz që përfshin një fond prej 10 miliardë dollarësh për 211 federatat anëtare, në këmbim të mbështetjes së tyre për një model të ri të menaxhimit të kompeticioneve më të rëndësishme të futbollit.
Sipas The Times, Infantino synon të krijojë kompaninë "FIFA Forward Enterprise", e cila do të administrojë të drejtat komerciale të Kupës së Botës për meshkuj, Kupës së Botës për femra dhe Kupës së Botës për Klube.
Nëse plani miratohet, çdo federatë anëtare do të përfitojë rreth 17.5 milionë euro, me të drejtën për ta mbajtur ose shitur këtë pjesë financiare. Federatat kanë 53 ditë kohë për të vendosur nëse do t'i bashkohen projektit.
Nisma ka shkaktuar reagime të forta në futbollin ndërkombëtar. UEFA ka shprehur kundërshtimin e saj ndaj mënyrës se si është prezantuar projekti, ndërsa sipas Sky Sports, disa vende evropiane po shqyrtojnë edhe mundësinë e bojkotimit të Kupës së Botës nëse ai miratohet.
Kritika kanë ardhur edhe nga CONCACAF dhe Konfederata Aziatike e Futbollit, të cilat kanë denoncuar mungesën e transparencës dhe faktin se nuk janë konsultuar për një vendim që mund të ndryshojë të ardhmen e turneve më prestigjioze të FIFA-s.
Një tjetër element që ka nxitur debat është raportimi se Infantino mund të marrë një rol drejtues në kompaninë e re pas përfundimit të mandatit të tij si president i FIFA-s në vitin 2031.
