Roberto Mancini është zyrtarisht trajneri i ri i Kombëtares së Italisë, duke u rikthyer në krye të "Axurrëve" pas largimit të tij të bujshëm në vitin 2023. Konfirmimi është bërë nga Federata Italiane e Futbollit, ndërsa emërimi ishte paralajmëruar më herët edhe nga presidenti i Komitetit Olimpik Italian, Giovanni Malago.
Mancini do të prezantohet zyrtarisht më 29 korrik, së bashku me Claudio Ranierin, i cili do të mbajë postin e drejtorit teknik të përfaqësueses. Në stafin e tij pritet të jenë Leonardo Bonucci, Antonio Gagliardi, Massimo Maccarone dhe trajneri i portierëve Marco Roccati.
Nën drejtimin e tij, kombëtarja italiane fitoi Kampionatin Europian në vitin 2021, pasi mposhti Anglinë në finalen e "Wembley", ndërsa vendosi edhe rekordin historik prej 37 ndeshjesh radhazi pa humbje.
Megjithatë, aventura e tij u njollos nga eliminimi dramatik ndaj Maqedonisë së Veriut në "play-off"-in e Botërorit 2022, humbje që la Italinë për herë të dytë radhazi jashtë Kupës së Botës.
Pak muaj më vonë, Mancini dha dorëheqjen në mënyrë të papritur dhe pranoi drejtimin e kombëtares së Arabisë Saudite me një kontratë shumë milionëshe, një vendim që u kritikua ashpër nga tifozët dhe opinioni sportiv italian.
Pavarësisht polemikave që shoqëruan largimin e tij, Federata Italiane ka vendosur t'i besojë sërish Mancinit drejtimin e "Axurrëve", me synimin për ta rikthyer kombëtaren në elitën e futbollit botëror. Megjithatë, rikthimi i tij nuk është pritur njësoj nga të gjithë. Ish-trajneri Fabio Capello dhe figura të tjera të njohura të futbollit italian kanë shprehur rezerva, duke kujtuar mënyrën se si Mancini u largua për të pranuar ofertën e Arabisë Saudite.
