E ardhmja e pankinës së Kombëtares italiane mbetet e paqartë, por zhvillimet e fundit kanë ndryshuar ndjeshëm garën për trajnerin e ri të “Azzurrëve”.
Andrea Pirlo ka njoftuar zyrtarisht përmes rrjeteve sociale se nuk është më në garë për të marrë drejtimin e Italisë. Ndërkohë, dorëheqja e Paolo Maldinit dhe Leonardo-s ka rihapur skenarin për rikthimin e Roberto Mancinit.
Sipas mediave italiane, Mancini ka qenë prej kohësh kandidati i preferuar i drejtuesve të Federatës Italiane dhe, pas largimit të Maldinit dhe bashkëpunëtorëve të tij, ai është rikthyer në krye të listës së kandidatëve. Trajneri që udhëhoqi Italinë drejt triumfit në Euro 2020 konsiderohet aktualisht favoriti kryesor për të marrë sërish drejtimin e kombëtares.
Në garë mbetet edhe Antonio Conte. Ish-trajneri i Napolit ka deklaruar se nuk është kontaktuar nga Federata, megjithatë emri i tij vazhdon të mbështetet nga një pjesë e drejtuesve të klubeve të Serie A. Raportimet flasin gjithashtu për një rol të mundshëm drejtues të Giorgio Chiellinit në kombëtare, një lëvizje që mund të ndikojë edhe në përzgjedhjen e trajnerit të ri.
Pas refuzimeve të Pep Guardiolës dhe Carlo Ancelottit, si edhe tërheqjes së Andrea Pirlos, Federata Italiane vijon kërkimet për trajnerin që do të udhëheqë Italinë në ciklin e ri.
