Barcelona vazhdon të mbajë në radar sulmuesin argjentinas Julian Alvarez, të cilin e sheh si pasardhësin afatgjatë të Robert Lewandowskit, por klubi katalanas nuk ka ndërmend të rrisë ofertën e tij aktuale.
Sipas raportimeve nga Spanja, drejtuesit e Barcelonës janë të gatshëm të ofrojnë deri në 100 milionë euro, ndërsa Atletico Madridi ka bërë të qartë se nuk dëshiron të ulet në negociata për një nga lojtarët kryesorë të skuadrës.
Presidenti Joan Laporta kishte lënë të kuptohej më herët se oferta e Barcelonës nuk do të qëndronte pafundësisht në tavolinë, por klubi nuk po nxiton të marrë një vendim përfundimtar.
Katalanasit besojnë se aktualisht kanë alternativa të mjaftueshme në sulm, pas afrimeve të Anthony Gordon dhe Karim Adeyemit, ndërsa Ferran Torres, Dani Olmo dhe Raphinha mund të luajnë gjithashtu si sulmues qendror kur të jetë e nevojshme.
Trajneri Hansi Flick kërkon një sulmues të nivelit elitar, por Barcelona nuk dëshiron të bëjë një investim të madh vetëm për të realizuar një transferim. Nëse Atletico nuk ndryshon qëndrim, klubi katalanas është i gatshëm të vazhdojë sezonin me grupin aktual të lojtarëve ofensivë.
