Presidenti amerikan Donald Trump ka hedhur poshtë kundërshtimet e kryeministrit izraelit Benjamin Netanyahu për një shitje të mundshme të avionëve luftarakë amerikanë F-35 ndaj Turqisë.
“Askush nuk më thotë se çfarë duhet të shesim”, deklaroi Trump për gazetarët në bordin e avionit presidencial “Air Force One”, duke mbrojtur të drejtën e Uashingtonit për të marrë vendime mbi eksportet ushtarake.
Trump e cilësoi Turqinë si “një aleat të jashtëzakonshëm” dhe vlerësoi rolin e Ankarasë në zhvillimet rajonale, veçanërisht në Siri. Ai pranoi se Turqia nuk ka marrëdhënie të ngrohta me Izraelin dhe kryeministrin Netanyahu, por theksoi se partneriteti mes SHBA-së dhe Turqisë mbetet i fortë.
Gjatë samitit të NATO-s në Turqi, Trump u shpreh se do të “konsideronte patjetër” rikthimin e shitjeve të avionëve F-35 për Ankaranë, duke e përshkruar Turqinë si një vend “shumë më besnik se shumë vende të tjera”.
Ndërkohë, duke folur për situatën me Iranin, presidenti amerikan tha se ai dhe Netanyahu janë “shumë afër” në qëndrimet e tyre, edhe pse pranoi se ekziston “një dallim i vogël” mes tyre për mënyrën e trajtimit të çështjes iraniane.
